Sukta 184

184.1

6 agastyo maitravarunih, ashvinau, trishtup

ता वा॑म॒द्य ताव॑प॒रं हु॑वेमो॒च्छन्त्या॑मु॒षसि॒ वह्नि॑रु॒क्थैः ।
नास॑त्या॒ कुह॑ चि॒त् सन्ता॑व॒र्यो दि॒वो नपा॑ता सु॒दास्त॑राय ॥१॥

Ta vamadya tavaparam huvemochchhantyamushasi vahnirukthaih
Nasatya kuha chit santavaryo divo napata sudastaraya

अ॒स्मे ऊ॒ षु वृ॑षणा मादयेथा॒मुत् प॒णीँर्ह॑तमू॒र्म्या मद॑न्ता ।
श्रु॒तं मे॒ अच्छो॑क्तिभिर्मती॒नामेष्टा॑ नरा॒ निचे॑तारा च॒ कर्णै॑ः ॥२॥

Asme u shu vrishana madayethamut paninrhatamurmya madanta
Shrutam me achchhoktibhirmatinameshta nara nichetara cha karnaih

श्रि॒ये पू॑षन्निषु॒कृते॑व दे॒वा नास॑त्या वह॒तुं सू॒र्याया॑ः ।
व॒च्यन्ते॑ वां ककु॒हा अ॒प्सु जा॒ता यु॒गा जू॒र्णेव॒ वरु॑णस्य॒ भूरे॑ः ॥३॥

Shriye pushannishukriteva deva nasatya vahatum suryayah
Vachyante vam kakuha apsu jata yuga jurneva varunasya bhureh

अ॒स्मे सा वां॑ माध्वी रा॒तिर॑स्तु॒ स्तोमं॑ हिनोतं मा॒न्यस्य॑ का॒रोः ।
अनु॒ यद् वां॑ श्रव॒स्या॑ सुदानू सु॒वीर्या॑य चर्ष॒णयो॒ मद॑न्ति ॥४॥

Asme sa vam madhvi ratirastu stomam hinotam manyasya karoh
Anu yad vam shravasya sudanu suviryaya charshanayo madanti

ए॒ष वां॒ स्तोमो॑ अश्विनावकारि॒ माने॑भिर्मघवाना सुवृ॒क्ति ।
या॒तं व॒र्तिस्तन॑याय॒ त्मने॑ चा॒गस्त्ये॑ नासत्या॒ मद॑न्ता ॥५॥

Esha vam stomo ashvinavakari manebhirmaghavana suvrikti
Yatam vartistanayaya tmane chagastye nasatya madanta

अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि ।
एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुम् ॥६॥

Atarishma tamasasparamasya prati vam stomo ashvinavadhayi
Eha yatam pathibhirdevayanairvidyamesham vrijanam jiradanum