সূক্ত 184

184.1

৬ অগস্ত্যো মৈত্রাবরুণিঃ ।অশ্বিনৌ। ত্রিষ্টুপ্।

তা বামদ্য তাবপরং হুবেমোচ্ছন্ত্যামুষসি বহ্নিরুক্থৈঃ ।
নাসত্যা কুহ চিৎ সন্তাবর্যো দিবো নপাতা সুদাস্তরায় ॥১॥

অস্মে ঊ ষু বৃষণা মাদয়েথামুৎ পণীঁর্হতমূর্ম্যা মদন্তা ।
শ্রুতং মে অচ্ছোক্তিভির্মতীনামেষ্টা নরা নিচেতারা চ কর্ণৈঃ ॥২॥

শ্রিয়ে পূষন্নিষুকৃতেব দেবা নাসত্যা বহতুং সূর্যায়াঃ ।
বচ্যন্তে বাং ককুহা অপ্সু জাতা যুগা জূর্ণেব বরুণস্য ভূরেঃ ॥৩॥

অস্মে সা বাং মাধ্বী রাতিরস্তু স্তোমং হিনোতং মান্যস্য কারোঃ ।
অনু যদ্ বাং শ্রবস্যা সুদানূ সুবীর্যায় চর্ষণয়ো মদন্তি ॥৪॥

এষ বাং স্তোমো অশ্বিনাবকারি মানেভির্মঘবানা সুবৃক্তি ।
যাতং বর্তিস্তনয়ায় ত্মনে চাগস্ত্যে নাসত্যা মদন্তা ॥৫॥

অতারিষ্ম তমসস্পারমস্য প্রতি বাং স্তোমো অশ্বিনাবধায়ি ।
এহ যাতং পথিভির্দেবয়ানৈর্বিদ্যামেষং বৃজনং জীরদানুম্ ॥৬॥