Sukta 183

183.1

6 agastyo maitravarunih, ashvinau, trishtup

तं यु॑ञ्जाथां॒ मन॑सो॒ यो जवी॑यान् त्रिवन्धु॒रो वृ॑षणा॒ यस्त्रि॑च॒क्रः ।
येनो॑पया॒थः सु॒कृतो॑ दुरो॒णं त्रि॒धातु॑ना पतथो॒ विर्न प॒र्णैः ॥१॥

Tam yunjatham manaso yo javiyan trivandhuro vrishana yastrichakrah
Yenopayathah sukrito duronam tridhatuna patatho virna parnaih

183.2

सु॒वृद् रथो॑ वर्तते॒ यन्न॒भि क्षां यत् तिष्ठ॑थ॒ः क्रतु॑म॒न्तानु॑ पृ॒क्षे ।
वपु॑र्वपु॒ष्या स॑चतामि॒यं गीर्दि॒वो दु॑हि॒त्रोषसा॑ सचेथे ॥२॥

Suvrid ratho vartate yannabhi ksham yat tishthathah kratumantanu prikshe
Vapurvapushya sachatamiyam girdivo duhitroshasa sachethe

183.3

आ ति॑ष्ठतं सु॒वृतं॒ यो रथो॑ वा॒मनु॑ व्र॒तानि॒ वर्त॑ते ह॒विष्मा॑न् ।
येन॑ नरा नासत्येष॒यध्यै॑ व॒र्तिर्या॒थस्तन॑याय॒ त्मने॑ च ॥३॥

A tishthatam suvritam yo ratho vamanu vratani vartate havishman
Yena nara nasatyeshayadhyai vartiryathastanayaya tmane cha

183.4

मा वां॒ वृको॒ मा वृ॒कीरा द॑धर्षी॒न्मा परि॑ वर्क्तमु॒त माति॑ धक्तम् ।
अ॒यं वां॑ भा॒गो निहि॑त इ॒यं गीर्दस्रा॑वि॒मे वां॑ नि॒धयो॒ मधू॑नाम् ॥४॥

Ma vam vriko ma vrikira dadharshinma pari varktamuta mati dhaktam
Ayam vam bhago nihita iyam girdasravime vam nidhayo madhunam

183.5

यु॒वां गोत॑मः पुरुमी॒ळहो अत्रि॒र्दस्रा॒ हव॒तेऽव॑से ह॒विष्मा॑न् ।
दिशं॒ न दि॒ष्टामृ॑जू॒येव॒ यन्ता मे॒ हवं॑ नास॒त्योप॑ यातम् ॥५॥

Yuvam gotamah purumilaho atrirdasra havatevase havishman
Disham na dishtamrijuyeva yanta me havam nasatyopa yatam

183.6

अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि ।
एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुम् ॥६॥

Atarishma tamasasparamasya prati vam stomo ashvinavadhayi
Eha yatam pathibhirdevayanairvidyamesham vrijanam jiradanum