Sukta 182

182.1

8 agastyo maitravarunih, ashvinau, jagati, 6-8 trishtup

अभू॑दि॒दं व॒युन॒मो षु भू॑षता॒ रथो॒ वृष॑ण्वा॒न् मद॑ता मनीषिणः ।
धि॒यं॒जि॒न्वा धिष्ण्या॑ वि॒श्पला॑वसू दि॒वो नपा॑ता सु॒कृते॒ शुचि॑व्रता ॥१॥

Abhudidam vayunamo shu bhushata ratho vrishanvan madata manishinah
Dhiyanjinva dhishnya vishpalavasu divo napata sukrite shuchivrata

182.2

इन्द्र॑तमा॒ हि धिष्ण्या॑ म॒रुत्त॑मा द॒स्रा दंसि॑ष्ठा र॒थ्या॑ र॒थीत॑मा ।
पू॒र्णं रथं॑ वहेथे॒ मध्व॒ आचि॑तं॒ तेन॑ दा॒श्वांस॒मुप॑ याथो अश्विना ॥२॥

Indratama hi dhishnya maruttama dasra dansishtha rathya rathitama
Purnam ratham vahethe madhva achitam tena dashvansamupa yatho ashvina

182.3

किमत्र॑ दस्रा कृणुथ॒ः किमा॑साथे॒ जनो॒ यः कश्चि॒दह॑विर्मही॒यते॑ ।
अति॑ क्रमिष्टं जु॒रतं॑ प॒णेरसुं॒ ज्योति॒र्विप्रा॑य कृणुतं वच॒स्यवे॑ ॥३॥

Kimatra dasra krinuthah kimasathe jano yah kashchidahavirmahiyate
Ati kramishtam juratam panerasum jyotirvipraya krinutam vachasyave

182.4

ज॒म्भय॑तम॒भितो॒ राय॑त॒ः शुनो॑ ह॒तं मृधो॑ वि॒दथु॒स्तान्य॑श्विना ।
वाचं॑वाचं जरि॒तू र॒त्निनीं॑ कृतमु॒भा शंसं॑ नासत्यावतं॒ मम॑ ॥४॥

Jambhayatamabhito rayatah shuno hatam mridho vidathustanyashvina
Vachanvacham jaritu ratninim kritamubha shansam nasatyavatam mama

182.5

यु॒वमे॒तं च॑क्रथु॒ः सिन्धु॑षु प्ल॒वमा॑त्म॒न्वन्तं॑ प॒क्षिणं॑ तौ॒ग्र्याय॒ कम् ।
येन॑ देव॒त्रा मन॑सा निरू॒हथु॑ः सुपप्त॒नी पे॑तथु॒ः क्षोद॑सो म॒हः ॥५॥

Yuvametam chakrathuh sindhushu plavamatmanvantam pakshinam taugryaya kam
Yena devatra manasa niruhathuh supaptani petathuh kshodaso mahah

182.6

अव॑विद्धं तौ॒ग्र्यम॒प्स्व१न्तर॑नारम्भ॒णे तम॑सि॒ प्रवि॑द्धम् ।
चत॑स्रो॒ नावो॒ जठ॑लस्य॒ जुष्टा॒ उद॒श्विभ्या॑मिषि॒ताः पा॑रयन्ति ॥६॥

Avaviddham taugryamapsva1ntaranarambhane tamasi praviddham
Chatasro navo jathalasya jushta udashvibhyamishitah parayanti

182.7

कः स्वि॑द् वृ॒क्षो निष्ठि॑तो॒ मध्ये॒ अर्ण॑सो॒ यं तौ॒ग्र्यो ना॑धि॒तः प॒र्यष॑स्वजत् ।
प॒र्णा मृ॒गस्य॑ प॒तरो॑रिवा॒रभ॒ उद॑श्विना ऊहथु॒ः श्रोम॑ताय॒ कम् ॥७॥

Kah svid vriksho nishthito madhye arnaso yam taugryo nadhitah paryashasvajat
Parna mrigasya patarorivarabha udashvina uhathuh shromataya kam

182.8

तद् वां नरा नासत्या॒वनु॑ ष्या॒द् यद् वां॒ माना॑स उ॒चथ॒मवो॑चन् ।
अ॒स्माद॒द्य सद॑सः सो॒म्यादा वि॒द्यामे॒षं वृ॒जनं॑ जी॒रदा॑नुम् ॥८॥

Tad vam nara nasatyavanu shyad yad vam manasa uchathamavochan
Asmadadya sadasah somyada vidyamesham vrijanam jiradanum