Sukta 181

181.1

9 agastyo maitravarunih, ashvinau, trishtup

कदु॒ प्रेष्टा॑वि॒षां र॑यी॒णाम॑ध्व॒र्यन्ता॒ यदु॑न्निनी॒थो अ॒पाम् ।
अ॒यं वां॑ य॒ज्ञो अ॑कृत॒ प्रश॑स्तिं॒ वसु॑धिती॒ अवि॑तारा जनानाम् ॥१॥

Kadu preshtavisham rayinamadhvaryanta yadunninitho apam
Ayam vam yagyo akrita prashastim vasudhiti avitara jananam

आ वा॒मश्वा॑स॒ः शुच॑यः पय॒स्पा वात॑रंहसो दि॒व्यासो॒ अत्या॑ः ।
म॒नो॒जुवो॒ वृष॑णो वी॒तपृ॑ष्ठा॒ एह स्व॒राजो॑ अ॒श्विना॑ वहन्तु ॥२॥

A vamashvasah shuchayah payaspa vataranhaso divyaso atyah
Manojuvo vrishano vitaprishtha eha svarajo ashvina vahantu

आ वां॒ रथो॒ऽवनि॒र्न प्र॒वत्वा॑न् त्सृ॒प्रव॑न्धुरः सुवि॒ताय॑ गम्याः ।
वृष्ण॑ः स्थातारा॒ मन॑सो॒ जवी॑यानहम्पू॒र्वो य॑ज॒तो धि॑ष्ण्या॒ यः ॥३॥

A vam rathovanirna pravatvan tsripravandhurah suvitaya gamyah
Vrishnah sthatara manaso javiyanahampurvo yajato dhishnya yah

इ॒हेह॑ जा॒ता सम॑वावशीतामरे॒पसा॑ त॒न्वा॒३ नाम॑भि॒ः स्वैः ।
जि॒ष्णुर्वा॑म॒न्यः सुम॑खस्य सू॒रिर्दि॒वो अ॒न्यः सु॒भग॑ः पु॒त्र ऊ॑हे ॥४॥

Iheha jata samavavashitamarepasa tanva3 namabhih svaih
Jishnurvamanyah sumakhasya surirdivo anyah subhagah putra uhe

प्र वां॑ निचे॒रुः क॑कु॒हो वशाँ॒ अनु॑ पि॒शङ्ग॑रूप॒ः सद॑नानि गम्याः ।
हरी॑ अ॒न्यस्य॑ पी॒पय॑न्त॒ वाजै॑र्म॒थ्रा रजां॑स्यश्विना॒ वि घोषै॑ः ॥५॥

Pra vam nicheruh kakuho vasham anu pishangarupah sadanani gamyah
Hari anyasya pipayanta vajairmathra rajansyashvina vi ghoshaih

प्र वां॑ श॒रद्वा॑न् वृष॒भो न नि॒ष्षाट् पू॒र्वीरिष॑श्चरति॒ मध्व॑ इ॒ष्णन् ।
एवै॑र॒न्यस्य॑ पी॒पय॑न्त॒ वाजै॒र्वेष॑न्तीरू॒र्ध्वा न॒द्यो॑ न॒ आगु॑ः ॥६॥

Pra vam sharadvan vrishabho na nishshat purvirishashcharati madhva ishnan
Evairanyasya pipayanta vajairveshantirurdhva nadyo na aguh

अस॑र्जि वां॒ स्थवि॑रा वेधसा॒ गीर्बा॒ळहे अ॑श्विना त्रे॒धा क्षर॑न्ती ।
उप॑स्तुताववतं॒ नाध॑मानं॒ याम॒न्नया॑मञ्छृणुतं॒ हवं॑ मे ॥७॥

Asarji vam sthavira vedhasa girbalahe ashvina tredha ksharanti
Upastutavavatam nadhamanam yamannayamanchhrinutam havam me

उ॒त स्या वां॒ रुश॑तो॒ वप्स॑सो॒ गीस्त्रि॑ब॒र्हिषि॒ सद॑सि पिन्वते॒ नॄन् ।
वृषा॑ वां मे॒घो वृ॑षणा पीपाय॒ गोर्न सेके॒ मनु॑षो दश॒स्यन् ॥८॥

Uta sya vam rushato vapsaso gistribarhishi sadasi pinvate nrin
Vrisha vam megho vrishana pipaya gorna seke manusho dashasyan

यु॒वां पू॒षेवा॑श्विना॒ पुरं॑धिर॒ग्निमु॒षां न ज॑रते ह॒विष्मा॑न् ।
हु॒वे यद् वां॑ वरिव॒स्या गृ॑णा॒नो वि॒द्यामे॒षं वृ॒जनं॑ जी॒रदा॑नुम् ॥९॥

Yuvam pushevashvina purandhiragnimusham na jarate havishman
Huve yad vam varivasya grinano vidyamesham vrijanam jiradanum