Sukta 180

180.1

1-10 agastyo maitravarunih, ashvinau, trishtup

यु॒वो रजां॑सि सु॒यमा॑सो॒ अश्वा॒ रथो॒ यद्वां॒ पर्यर्णां॑सि॒ दीय॑त् ।
हि॒र॒ण्यया॑ वां प॒वय॑ः प्रुषाय॒न् मध्व॒ः पिब॑न्ता उ॒षस॑ः सचेथे ॥१॥

Yuvo rajansi suyamaso ashva ratho yadvam paryarnansi diyat
Hiranyaya vam pavayah prushayan madhvah pibanta ushasah sachethe

यु॒वमत्य॒स्याव॑ नक्षथो॒ यद् विप॑त्मनो॒ नर्य॑स्य॒ प्रय॑ज्योः ।
स्वसा॒ यद् वां विश्वगूर्ती॒ भरा॑ति॒ वाजा॒येट्टे॑ मधुपावि॒षे च॑ ॥२॥

Yuvamatyasyava nakshatho yad vipatmano naryasya prayajyoh
Svasa yad vam vishvagurti bharati vajayette madhupavishe cha

यु॒वं पय॑ उ॒स्रिया॑यामधत्तं प॒क्वमा॒माया॒मव॒ पूर्व्यं॒ गोः ।
अ॒न्तर्यद् व॒निनो॑ वामृतप्सू ह्वा॒रो न शुचि॒र्यज॑ते ह॒विष्मा॑न् ॥३॥

Yuvam paya usriyayamadhattam pakvamamayamava purvyam goh
Antaryad vanino vamritapsu hvaro na shuchiryajate havishman

यु॒वं ह॑ घ॒र्मं मधु॑मन्त॒मत्र॑ये॒ ऽपो न क्षोदो॑ऽवृणीतमे॒षे ।
तद् वां॑ नरावश्विना॒ पश्व॑इष्टी॒ रथ्ये॑व च॒क्रा प्रति॑ यन्ति॒ मध्व॑ः ॥४॥

Yuvam ha gharmam madhumantamatraye po na kshodovrinitameshe
Tad vam naravashvina pashvaishti rathyeva chakra prati yanti madhvah

आ वां॑ दा॒नाय॑ ववृतीय दस्रा॒ गोरोहे॑ण तौ॒ग्र्यो न जिव्रि॑ः ।
अ॒पः क्षो॒णी स॑चते॒ माहि॑ना वां जू॒र्णो वा॒मक्षु॒रंह॑सो यजत्रा ॥५॥

A vam danaya vavritiya dasra gorohena taugryo na jivrih
Apah kshoni sachate mahina vam jurno vamakshuranhaso yajatra

नि यद् यु॒वेथे॑ नि॒युत॑ः सुदानू॒ उप॑ स्व॒धाभि॑ः सृजथ॒ः पुरं॑धिम् ।
प्रेष॒द् वेष॒द् वातो॒ न सू॒रिरा म॒हे द॑दे सुव्र॒तो न वाज॑म् ॥६॥

Ni yad yuvethe niyutah sudanu upa svadhabhih srijathah purandhim
Preshad veshad vato na surira mahe dade suvrato na vajam

व॒यं चि॒द्धि वां॑ जरि॒तार॑ः स॒त्या वि॑प॒न्याम॑हे॒ वि प॒णिर्हि॒तावा॑न् ।
अधा॑ चि॒द्धि ष्मा॑श्विनावनिन्द्या पा॒थो हि ष्मा॑ वृषणा॒वन्ति॑देवम् ॥७॥

Vayam chiddhi vam jaritarah satya vipanyamahe vi panirhitavan
Adha chiddhi shmashvinavanindya patho hi shma vrishanavantidevam

यु॒वां चि॒द्धि ष्मा॑श्विना॒वनु॒ द्यून् विरु॑द्रस्य प्र॒स्रव॑णस्य सा॒तौ ।
अ॒गस्त्यो॑ न॒रां नृषु॒ प्रश॑स्त॒ः कारा॑धुनीव चितयत् स॒हस्रै॑ः ॥८॥

Yuvam chiddhi shmashvinavanu dyun virudrasya prasravanasya satau
Agastyo naram nrishu prashastah karadhuniva chitayat sahasraih

प्र यद् वहे॑थे महि॒ना रथ॑स्य॒ प्र स्य॑न्द्रा याथो॒ मनु॑षो॒ न होता॑ ।
ध॒त्तं सू॒रिभ्य॑ उ॒त वा॒ स्वश्व्यं॒ नास॑त्या रयि॒षाच॑ः स्याम ॥९॥

Pra yad vahethe mahina rathasya pra syandra yatho manusho na hota
Dhattam suribhya uta va svashvyam nasatya rayishachah syama

तं वां॒ रथं॑ व॒यम॒द्या हु॑वेम॒ स्तोमै॑रश्विना सुवि॒ताय॒ नव्य॑म् ।
अरि॑ष्टनेमिं॒ परि॒ द्यामि॑या॒नं वि॒द्यामे॒षं वृ॒जनं॑ जी॒रदा॑नुम् ॥१०॥

Tam vam ratham vayamadya huvema stomairashvina suvitaya navyam
Arishtanemim pari dyamiyanam vidyamesham vrijanam jiradanum