Sukta 179

179.1

(6) 1-2 lopamudra, 3-4 agastyo maitravarunih, 5-6 agastyashishyo brahmachari, ratih, trishtup, 5 brihati

पू॒र्वीर॒हं श॒रद॑ः शश्रमा॒णा दो॒षा वस्तो॑रु॒षसो॑ ज॒रय॑न्तीः ।
मि॒नाति॒ श्रियं॑ जरि॒मा त॒नूना॒मप्यू॒ नु पत्नी॒र्वृष॑णो जगम्युः ॥१॥

Purviraham sharadah shashramana dosha vastorushaso jarayantih
Minati shriyam jarima tanunamapyu nu patnirvrishano jagamyuh

179.2

ये चि॒द्धि पूर्व॑ ऋत॒साप॒ आस॑न् त्सा॒कं दे॒वेभि॒रव॑दन्नृ॒तानि॑ ।
ते चि॒दवा॑सुर्न॒ह्यन्त॑मा॒पुः समू॒ नु पत्नी॒र्वृष॑भिर्जगम्युः ॥२॥

Ye chiddhi purva ritasapa asan tsakam devebhiravadannritani
Te chidavasurnahyantamapuh samu nu patnirvrishabhirjagamyuh

179.3

न मृषा॑ श्रा॒न्तं यदव॑न्ति दे॒वा विश्वा॒ इत् स्पृधो॑ अ॒भ्य॑श्नवाव ।
जया॒वेदत्र॑ श॒तनी॑थमा॒जिं यत् स॒म्यञ्चा॑ मिथु॒नाव॒भ्यजा॑व ॥३॥

Na mrisha shrantam yadavanti deva vishva it spridho abhyashnavava
Jayavedatra shatanithamajim yat samyancha mithunavabhyajava

179.4

न॒दस्य॑ मा रुध॒तः काम॒ आग॑न्नि॒त आजा॑तो अ॒मुत॒ः कुत॑श्चित् ।
लोपा॑मुद्रा॒ वृष॑णं॒ नी रि॑णाति॒ धीर॒मधी॑रा धयति श्व॒सन्त॑म् ॥४॥

Nadasya ma rudhatah kama agannita ajato amutah kutashchit
Lopamudra vrishanam ni rinati dhiramadhira dhayati shvasantam

179.5

इ॒मं नु सोम॒मन्ति॑तो हृ॒त्सु पी॒तमुप॑ ब्रुवे ।
यत् सी॒माग॑श्चकृ॒मा तत् सु मृ॑ळतु पुलु॒कामो॒ हि मर्त्य॑ः ॥५॥

Imam nu somamantito hritsu pitamupa bruve
Yat simagashchakrima tat su mrilatu pulukamo hi martyah

179.6

अ॒गस्त्य॒ः खन॑मानः ख॒नित्रै॑ः प्र॒जामप॑त्यं॒ बल॑मि॒च्छमा॑नः ।
उ॒भौ वर्णा॒वृषि॑रु॒ग्रः पु॑पोष स॒त्या दे॒वेष्वा॒शिषो॑ जगाम ॥६॥

Agastyah khanamanah khanitraih prajamapatyam balamichchhamanah
Ubhau varnavrishirugrah puposha satya deveshvashisho jagama