Sukta 178

178.1

5 agastyo maitravarunih, indrah, trishtup

यद्ध॒ स्या त॑ इन्द्र श्रु॒ष्टिरस्ति॒ यया॑ ब॒भूथ॑ जरि॒तृभ्य॑ ऊ॒ती ।
मा न॒ः कामं॑ म॒हय॑न्त॒मा ध॒ग्विश्वा॑ ते अश्यां॒ पर्याप॑ आ॒योः ॥१॥

Yaddha sya ta indra shrushtirasti yaya babhutha jaritribhya uti
Ma nah kamam mahayantama dhagvishva te ashyam paryapa ayoh

न घा॒ राजेन्द्र॒ आ द॑भन्नो॒ या नु स्वसा॑रा कृ॒णव॑न्त॒ योनौ॑ ।
आप॑श्चिदस्मै सु॒तुका॑ अवेष॒न् गम॑न्न॒ इन्द्र॑ः स॒ख्या वय॑श्च ॥२॥

Na gha rajendra a dabhanno ya nu svasara krinavanta yonau
Apashchidasmai sutuka aveshan gamanna indrah sakhya vayashcha

जेता॒ नृभि॒रिन्द्र॑ः पृ॒त्सु शूर॒ः श्रोता॒ हवं॒ नाध॑मानस्य का॒रोः ।
प्रभ॑र्ता॒ रथं॑ दा॒शुष॑ उपा॒क उद्य॑न्ता॒ गिरो॒ यदि॑ च॒ त्मना॒ भूत् ॥३॥

Jeta nribhirindrah pritsu shurah shrota havam nadhamanasya karoh
Prabharta ratham dashusha upaka udyanta giro yadi cha tmana bhut

ए॒वा नृभि॒रिन्द्र॑ः सुश्रव॒स्या प्र॑खा॒दः पृ॒क्षो अ॒भि मि॒त्रिणो॑ भूत् ।
स॒म॒र्य इ॒षः स्त॑वते॒ विवा॑चि सत्राक॒रो यज॑मानस्य॒ शंस॑ः ॥४॥

Eva nribhirindrah sushravasya prakhadah priksho abhi mitrino bhut
Samarya ishah stavate vivachi satrakaro yajamanasya shansah

त्वया॑ व॒यं म॑घवन्निन्द्र॒ शत्रू॑न॒भि ष्या॑म मह॒तो मन्य॑मानान् ।
त्वं त्रा॒ता त्वमु॑ नो वृ॒धे भू॑र्वि॒द्यामे॒षं वृ॒जनं॑ जी॒रदा॑नुम् ॥५॥

Tvaya vayam maghavannindra shatrunabhi shyama mahato manyamanan
Tvam trata tvamu no vridhe bhurvidyamesham vrijanam jiradanum