Sukta 177

177.1

5 agastyo maitravarunih, indrah, trishtup

आ च॑र्षणि॒प्रा वृ॑ष॒भो जना॑नां॒ राजा॑ कृष्टी॒नां पु॑रुहू॒त इन्द्र॑ः ।
स्तु॒तः श्र॑व॒स्यन्नव॒सोप॑ म॒द्रिग्यु॒क्त्वा हरी॒ वृष॒णा या॑ह्य॒र्वाङ् ॥१॥

A charshanipra vrishabho jananam raja krishtinam puruhuta indrah
Stutah shravasyannavasopa madrigyuktva hari vrishana yahyarvang

177.2

ये ते॒ वृष॑णो वृष॒भास॑ इन्द्र ब्रह्म॒युजो॒ वृष॑रथासो॒ अत्या॑ः ।
ताँ आ ति॑ष्ठ॒ तेभि॒रा या॑ह्य॒र्वाङ् हवा॑महे त्वा सु॒त इ॑न्द्र॒ सोमे॑ ॥२॥

Ye te vrishano vrishabhasa indra brahmayujo vrisharathaso atyah
Tam a tishtha tebhira yahyarvang havamahe tva suta indra some

177.3

आ ति॑ष्ठ॒ रथं॒ वृष॑णं॒ वृषा॑ ते सु॒तः सोम॒ः परि॑षिक्ता॒ मधू॑नि ।
यु॒क्त्वा वृष॑भ्यां वृषभ क्षिती॒नां हरि॑भ्यां याहि प्र॒वतोप॑ म॒द्रिक् ॥३॥

A tishtha ratham vrishanam vrisha te sutah somah parishikta madhuni
Yuktva vrishabhyam vrishabha kshitinam haribhyam yahi pravatopa madrik

177.4

अ॒यं य॒ज्ञो दे॑व॒या अ॒यं मि॒येध॑ इ॒मा ब्रह्मा॑ण्य॒यमि॑न्द्र॒ सोम॑ः ।
स्ती॒र्णं ब॒र्हिरा तु श॑क्र॒ प्र या॑हि॒ पिबा॑ नि॒षद्य॒ वि मु॑चा॒ हरी॑ इ॒ह ॥४॥

Ayam yagyo devaya ayam miyedha ima brahmanyayamindra somah
Stirnam barhira tu shakra pra yahi piba nishadya vi mucha hari iha

177.5

ओ सुष्टु॑त इन्द्र याह्य॒र्वाङुप॒ ब्रह्मा॑णि मा॒न्यस्य॑ का॒रोः ।
वि॒द्याम॒ वस्तो॒रव॑सा गृ॒णन्तो॑ वि॒द्यामे॒षं वृ॒जनं॑ जी॒रदा॑नुम् ॥५॥

O sushtuta indra yahyarvangupa brahmani manyasya karoh
Vidyama vastoravasa grinanto vidyamesham vrijanam jiradanum