Sukta 176

176.1

6 agastyo maitravarunih, indrah, anushtup, 6 trishtup

मत्सि॑ नो॒ वस्य॑ इष्टय॒ इन्द्र॑मिन्दो॒ वृषा वि॑श ।
ऋ॒घा॒यमा॑ण इन्वसि॒ शत्रु॒मन्ति॒ न वि॑न्दसि ॥१॥

Matsi no vasya ishtaya indramindo vrisha visha
Righayamana invasi shatrumanti na vindasi

तस्मि॒न्ना वे॑शया॒ गिरो॒ य एक॑श्चर्षणी॒नाम् ।
अनु॑ स्व॒धा यमु॒प्यते॒ यवं॒ न चर्कृ॑ष॒द् वृषा॑ ॥२॥

Tasminna veshaya giro ya ekashcharshaninam
Anu svadha yamupyate yavam na charkrishad vrisha

यस्य॒ विश्वा॑नि॒ हस्त॑यो॒ः पञ्च॑ क्षिती॒नां वसु॑ ।
स्पा॒शय॑स्व॒ यो अ॑स्म॒ध्रुग्दि॒व्येवा॒शनि॑र्जहि ॥३॥

Yasya vishvani hastayoh pancha kshitinam vasu
Spashayasva yo asmadhrugdivyevashanirjahi

असु॑न्वन्तं समं जहि दू॒णाशं॒ यो न ते॒ मय॑ः ।
अ॒स्मभ्य॑मस्य॒ वेद॑नं द॒द्धि सू॒रिश्चि॑दोहते ॥४॥

Asunvantam samam jahi dunasham yo na te mayah
Asmabhyamasya vedanam daddhi surishchidohate

आवो॒ यस्य॑ द्वि॒बर्ह॑सो॒ऽर्केषु॑ सानु॒षगस॑त् ।
आ॒जाविन्द्र॑स्येन्दो॒ प्रावो॒ वाजे॑षु वा॒जिन॑म् ॥५॥

Avo yasya dvibarhasorkeshu sanushagasat
Ajavindrasyendo pravo vajeshu vajinam

यथा॒ पूर्वे॑भ्यो जरि॒तृभ्य॑ इन्द्र॒ मय॑ इ॒वापो॒ न तृष्य॑ते ब॒भूथ॑ ।
तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुम् ॥६॥

Yatha purvebhyo jaritribhya indra maya ivapo na trishyate babhutha
Tamanu tva nividam johavimi vidyamesham vrijanam jiradanum