সূক্ত 180

180.1

১-১০ অগস্ত্যো মৈত্রাবরুণিঃ। অশ্বিনৌ। ত্রিষ্টুপ্।

যুবো রজাংসি সুয়মাসো অশ্বা রথো যদ্বাং পর্যর্ণাংসি দীয়ৎ ।
হিরণ্যয়া বাং পবয়ঃ প্রুষায়ন্ মধ্বঃ পিবন্তা উষসঃ সচেথে ॥১॥

যুবমত্যস্যাব নক্ষথো যদ্ বিপত্মনো নর্যস্য প্রয়জ্যোঃ ।
স্বসা যদ্ বাং বিশ্বগূর্তী ভরাতি বাজায়েট্টে মধুপাবিষে চ ॥২॥

যুবং পয় উস্রিয়ায়ামধত্তং পক্বমামায়ামব পূর্ব্যং গোঃ ।
অন্তর্যদ্ বনিনো বামৃতপ্সূ হ্বারো ন শুচির্যজতে হবিষ্মান্ ॥৩॥

যুবং হ ঘর্মং মধুমন্তমত্রয়ে ঽপো ন ক্ষোদোঽবৃণীতমেষে ।
তদ্ বাং নরাবশ্বিনা পশ্বইষ্টী রথ্যেব চক্রা প্রতি যন্তি মধ্বঃ ॥৪॥

আ বাং দানায় ববৃতীয় দস্রা গোরোহেণ তৌগ্র্যো ন জিব্রিঃ ।
অপঃ ক্ষোণী সচতে মাহিনা বাং জূর্ণো বামক্ষুরংহসো যজত্রা ॥৫॥

নি যদ্ যুবেথে নিয়ুতঃ সুদানূ উপ স্বধাভিঃ সৃজথঃ পুরংধিম্ ।
প্রেষদ্ বেষদ্ বাতো ন সূরিরা মহে দদে সুব্রতো ন বাজম্ ॥৬॥

বয়ং চিদ্ধি বাং জরিতারঃ সত্যা বিপন্যামহে বি পণির্হিতাবান্ ।
অধা চিদ্ধি ষ্মাশ্বিনাবনিন্দ্যা পাথো হি ষ্মা বৃষণাবন্তিদেবম্ ॥৭॥

যুবাং চিদ্ধি ষ্মাশ্বিনাবনু দ্যূন্ বিরুদ্রস্য প্রস্রবণস্য সাতৌ ।
অগস্ত্যো নরাং নৃষু প্রশস্তঃ কারাধুনীব চিতয়ৎ সহস্রৈঃ ॥৮॥

প্র যদ্ বহেথে মহিনা রথস্য প্র স্যন্দ্রা যাথো মনুষো ন হোতা ।
ধত্তং সূরিভ্য উত বা স্বশ্ব্যং নাসত্যা রয়িষাচঃ স্যাম ॥৯॥

তং বাং রথং বয়মদ্যা হুবেম স্তোমৈরশ্বিনা সুবিতায় নব্যম্ ।
অরিষ্টনেমিং পরি দ্যামিয়ানং বিদ্যামেষং বৃজনং জীরদানুম্ ॥১০॥