সূক্ত 181

181.1

৯ অগস্ত্যো মৈত্রাবরুণিঃ । অশ্বিনৌ। ত্রিষ্টুপ্।

কদু প্রেষ্টাবিষাং রয়ীণামধ্বর্যন্তা যদুন্নিনীথো অপাম্ ।
অয়ং বাং যজ্ঞো অকৃত প্রশস্তিং বসুধিতী অবিতারা জনানাম্ ॥১॥

181.2

আ বামশ্বাসঃ শুচয়ঃ পয়স্পা বাতরংহসো দিব্যাসো অত্যাঃ ।
মনোজুবো বৃষণো বীতপৃষ্ঠা এহ স্বরাজো অশ্বিনা বহন্তু ॥২॥

181.3

আ বাং রথোঽবনির্ন প্রবত্বান্ ত্সৃপ্রবন্ধুরঃ সুবিতায় গম্যাঃ ।
বৃষ্ণঃ স্থাতারা মনসো জবীয়ানহম্পূর্বো যজতো ধিষ্ণ্যা যঃ ॥৩॥

181.4

ইহেহ জাতা সমবাবশীতামরেপসা তন্বা৩ নামভিঃ স্বৈঃ ।
জিষ্ণুর্বামন্যঃ সুমখস্য সূরির্দিবো অন্যঃ সুভগঃ পুত্র ঊহে ॥৪॥

181.5

প্র বাং নিচেরুঃ ককুহো বশাঁ অনু পিশঙ্গরূপঃ সদনানি গম্যাঃ ।
হরী অন্যস্য পীপয়ন্ত বাজৈর্মথ্রা রজাংস্যশ্বিনা বি ঘোষৈঃ ॥৫॥

181.6

প্র বাং শরদ্বান্ বৃষভো ন নিষ্ষাট্ পূর্বীরিষশ্চরতি মধ্ব ইষ্ণন্ ।
এবৈরন্যস্য পীপয়ন্ত বাজৈর্বেষন্তীরূর্ধ্বা নদ্যো ন আগুঃ ॥৬॥

181.7

অসর্জি বাং স্থবিরা বেধসা গীর্বালহে অশ্বিনা ত্রেধা ক্ষরন্তী ।
উপস্তুতাববতং নাধমানং যামন্নয়ামঞ্ছৃণুতং হবং মে ॥৭॥

181.8

উত স্যা বাং রুশতো বপ্সসো গীস্ত্রিবর্হিষি সদসি পিন্বতে নৄন্ ।
বৃষা বাং মেঘো বৃষণা পীপায় গোর্ন সেকে মনুষো দশস্যন্ ॥৮॥

181.9

যুবাং পূষেবাশ্বিনা পুরংধিরগ্নিমুষাং ন জরতে হবিষ্মান্ ।
হুবে যদ্ বাং বরিবস্যা গৃণানো বিদ্যামেষং বৃজনং জীরদানুম্ ॥৯॥