Sukta 186

186.1

11 agastyo maitravarunih, vishve devah, trishtup

आ न॒ इळा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु ।
अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा ॥१॥

A na ilabhirvidathe sushasti vishvanarah savita deva etu
Api yatha yuvano matsatha no vishvam jagadabhipitve manisha

आ नो॒ विश्व॒ आस्क्रा॑ गमन्तु दे॒वा मि॒त्रो अ॑र्य॒मा वरु॑णः स॒जोषा॑ः ।
भुव॒न् यथा॑ नो॒ विश्वे॑ वृ॒धास॒ः कर॑न्त्सु॒षाहा॑ विथु॒रं न शव॑ः ॥२॥

A no vishva askra gamantu deva mitro aryama varunah sajoshah
Bhuvan yatha no vishve vridhasah karantsushaha vithuram na shavah

प्रेष्ठं॑ वो॒ अति॑थिं गृणीषे॒ ऽग्निं श॒स्तिभि॑स्तु॒र्वणि॑ः स॒जोषा॑ः ।
अस॒द् यथा॑ नो॒ वरु॑णः सुकी॒र्तिरिष॑श्च पर्षदरिगू॒र्तः सू॒रिः ॥३॥

Preshtham vo atithim grinishe gnim shastibhisturvanih sajoshah
Asad yatha no varunah sukirtirishashcha parshadarigurtah surih

उप॑ व॒ एषे॒ नम॑सा जिगी॒षोषासा॒नक्ता॑ सु॒दुघे॑व धे॒नुः ।
स॒मा॒ने अह॑न् वि॒मिमा॑नो अ॒र्कं विषु॑रूपे॒ पय॑सि॒ सस्मि॒न्नूध॑न् ॥४॥

Upa va eshe namasa jigishoshasanakta sudugheva dhenuh
Samane ahan vimimano arkam vishurupe payasi sasminnudhan

उ॒त नो ऽहि॑र्बु॒ध्न्यो॒३ मय॑स्क॒ः शिशुं॒ न पि॒प्युषी॑व वेति॒ सिन्धु॑ः ।
येन॒ नपा॑तम॒पां जु॒नाम॑ मनो॒जुवो॒ वृष॑णो॒ यं वह॑न्ति ॥५॥

Uta no hirbudhnyo3 mayaskah shishum na pipyushiva veti sindhuh
Yena napatamapam junama manojuvo vrishano yam vahanti

उ॒त न॑ ईं॒ त्वष्टा ग॒न्त्वच्छा॒ स्मत् सू॒रिभि॑रभिपि॒त्वे स॒जोषा॑ः ।
आ वृ॑त्र॒हेन्द्र॑श्चर्षणि॒प्रास्तु॒विष्ट॑मो न॒रां न॑ इ॒ह ग॑म्याः ॥६॥

Uta na im tvashta gantvachchha smat suribhirabhipitve sajoshah
A vritrahendrashcharshaniprastuvishtamo naram na iha gamyah

उ॒त न॑ ईं म॒तयोऽश्व॑योगा॒ः शिशुं॒ न गाव॒स्तरु॑णं रिहन्ति ।
तमीं॒ गिरो॒ जन॑यो॒ न पत्नी॑ः सुर॒भिष्ट॑मं न॒रां न॑सन्त ॥७॥

Uta na im matayoshvayogah shishum na gavastarunam rihanti
Tamim giro janayo na patnih surabhishtamam naram nasanta

उ॒त न॑ ईं म॒रुतो॑ वृ॒द्धसे॑ना॒ः स्मद् रोद॑सी॒ सम॑नसः सदन्तु ।
पृष॑दश्वासो॒ऽवन॑यो॒ न रथा॑ रि॒शाद॑सो मित्र॒युजो॒ न दे॒वाः ॥८॥

Uta na im maruto vriddhasenah smad rodasi samanasah sadantu
Prishadashvasovanayo na ratha rishadaso mitrayujo na devah

प्र नु यदे॑षां महि॒ना चि॑कि॒त्रे प्र यु॑ञ्जते प्र॒युज॒स्ते सु॑वृ॒क्ति ।
अध॒ यदे॑षां सु॒दिने॒ न शरु॒र्विश्व॒मेरि॑णं प्रुषा॒यन्त॒ सेना॑ः ॥९॥

Pra nu yadesham mahina chikitre pra yunjate prayujaste suvrikti
Adha yadesham sudine na sharurvishvamerinam prushayanta senah

प्रो अ॒श्विना॒वव॑से कृणुध्वं॒ प्र पू॒षणं॒ स्वत॑वसो॒ हि सन्ति॑ ।
अ॒द्वे॒षो विष्णु॒र्वात॑ ऋभु॒क्षा अच्छा॑ सु॒म्नाय॑ ववृतीय दे॒वान् ॥१०॥

Pro ashvinavavase krinudhvam pra pushanam svatavaso hi santi
Advesho vishnurvata ribhuksha achchha sumnaya vavritiya devan

इ॒यं सा वो॑ अ॒स्मे दीधि॑तिर्यजत्रा अपि॒प्राणी॑ च॒ सद॑नी च भूयाः ।
नि या दे॒वेषु॒ यत॑ते वसू॒युर्वि॒द्यामे॒षं वृ॒जनं॑ जी॒रदा॑नुम् ॥११॥

Iyam sa vo asme didhitiryajatra apiprani cha sadani cha bhuyah
Ni ya deveshu yatate vasuyurvidyamesham vrijanam jiradanum