সূক্ত 175

175.1

৬ অগস্ত্যো মৈত্রাবরুণিঃ । ইন্দ্রঃ। ১ স্কংধোগ্রীবী বৃহতী, ২-৫ অনুষ্টুপ্, ৬ ত্রিষ্টুপ্।

মত্স্যপায়ি তে মহঃ পাত্রস্যেব হরিবো মত্সরো মদঃ ।
বৃষা তে বৃষ্ণ ইন্দুর্বাজী সহস্রসাতমঃ ॥১॥

175.2

আ নস্তে গন্তু মত্সরো বৃষা মদো বরেণ্যঃ । সহাবাঁ ইন্দ্র সানসিঃ পৃতনাষালমর্ত্যঃ ॥২॥

175.3

ত্বং হি শূরঃ সনিতা চোদয়ো মনুষো রথম্ । সহাবান্ দস্যুমব্রতমোষঃ পাত্রং ন শোচিষা ॥৩॥

175.4

মুষায় সূর্যং কবে চক্রমীশান ওজসা । বহ শুষ্ণায় বধং কুত্সং বাতস্যাশ্বৈঃ ॥৪॥

175.5

শুষ্মিন্তমো হি তে মদো দ্যুম্নিন্তম উত ক্রতুঃ । বৃত্রঘ্না বরিবোবিদা মংসীষ্ঠা অশ্বসাতমঃ ॥৫॥

175.6

যথা পূর্বেভ্যো জরিতৃভ্য ইন্দ্র ময় ইবাপো ন তৃষ্যতে বভূথ ।
তামনু ত্বা নিবিদং জোহবীমি বিদ্যামেষং বৃজনং জীরদানুম্ ॥৬॥