সূক্ত 168

168.1

১০ অগস্ত্যো মৈত্রাবরুণিঃ । মরুতঃ। জগতী, ৮-১০ ত্রিষ্টুপ্।

যজ্ঞায়জ্ঞা বঃ সমনা তুতুর্বণির্ধিয়ংধিয়ং বো দেবয়া উ দধিধ্বে ।
আ বোঽর্বাচঃ সুবিতায় রোদস্যোর্মহে ববৃত্যামবসে সুবৃক্তিভিঃ ॥১॥

বব্রাসো ন যে স্বজাঃ স্বতবস ইষং স্বরভিজায়ন্ত ধূতয়ঃ ।
সহস্রিয়াসো অপাং নোর্ময় আসা গাবো বন্দ্যাসো নোক্ষণঃ ॥২॥

সোমাসো ন যে সুতাস্তৃপ্তাংশবো হৃত্সু পীতাসো দুবসো নাসতে ।
ঐষামংসেষু রম্ভিণীব রারভে হস্তেষু খাদিশ্চ কৃতিশ্চ সং দধে ॥৩॥

অব স্বয়ুক্তা দিব আ বৃথা যয়ুরমর্ত্যাঃ কশয়া চোদত ত্মনা ।
অরেণবস্তুবিজাতা অচুচ্যবুর্দৃলহানি চিন্মরুতো ভ্রাজদৃষ্টয়ঃ ॥৪॥

কো বোঽন্তর্মরুত ঋষ্টিবিদ্যুতো রেজতি ত্মনা হন্বেব জিহ্বয়া ।
ধন্বচ্যুত ইষাং ন যামনি পুরুপ্রৈষা অহন্যো৩ নৈতশঃ ॥৫॥

ক্ব স্বিদস্য রজসো মহস্পরং ক্বাবরং মরুতো যস্মিন্নায়য় ।
যচ্চ্যাবয়থ বিথুরেব সংহিতং ব্যদ্রিণা পতথ ত্বেষমর্ণবম্ ॥৬॥

সাতির্ন বোঽমবতী স্বর্বতী ত্বেষা বিপাকা মরুতঃ পিপিষ্বতী ।
ভদ্রা বো রাতিঃ পৃণতো ন দক্ষিণা পৃথুজ্রয়ী অসুর্যেব জঞ্জতী ॥৭॥

প্রতি ষ্টোভন্তি সিন্ধবঃ পবিভ্যো যদভ্রিয়াং বাচমুদীরয়ন্তি ।
অব স্ময়ন্ত বিদ্যুতঃ পৃথিব্যাং যদী ঘৃতং মরুতঃ প্রুষ্ণুবন্তি ॥৮॥

অসূত পৃশ্নির্মহতে রণায় ত্বেষময়াসাং মরুতামনীকম্ ।
তে সপ্সরাসোঽজনয়ন্তাভ্বমাদিৎ স্বধামিষিরাং পর্যপশ্যন্ ॥৯॥

এষ বঃ স্তোমো মরুত ইয়ং গীর্মান্দার্যস্য মান্যস্য কারোঃ ।
এষা যাসীষ্ট তন্বে বয়াং বিদ্যামেষং বৃজনং জীরদানুম্ ॥১০॥