সূক্ত 169

169.1

৮ অগস্ত্যো মৈত্রাবরুণঃ। ইন্দ্রঃ। ত্রিষ্টুপ্, ২ চতুষ্পদা বিরাট্।

মহশ্চিৎ ত্বমিন্দ্র যত এতান্ মহশ্চিদসি ত্যজসো বরূতা ।
স নো বেধো মরুতাং চিকিত্বান্ ত্সুম্না বনুষ্ব তব হি প্রেষ্ঠা ॥১॥

অয়ুজ্রন্ত ইন্দ্র বিশ্বকৃষ্টীর্বিদানাসো নিষ্ষিধো মর্ত্যত্রা ।
মরুতাং পৃত্সুতির্হাসমানা স্বর্মীলহস্য প্রধনস্য সাতৌ ॥২॥

অম্যক্ সা ত ইন্দ্র ঋষ্টিরস্মে সনেম্যভ্বং মরুতো জুনন্তি ।
অগ্নিশ্চিদ্ধি ষ্মাতসে শুশুক্বানাপো ন দ্বীপং দধতি প্রয়াংসি ॥৩॥

ত্বং তূ ন ইন্দ্র তং রয়িং দা ওজিষ্ঠয়া দক্ষিণয়েব রাতিম্ ।
স্তুতশ্চ যাস্তে চকনন্ত বায়োঃ স্তনং ন মধ্বঃ পীপয়ন্ত বাজৈঃ ॥৪॥

ত্বে রায় ইন্দ্র তোশতমাঃ প্রণেতারঃ কস্য চিদৃতায়োঃ ।
তে ষু ণো মরুতো মৃলয়ন্তু যে স্মা পুরা গাতূয়ন্তীব দেবাঃ ॥৫॥

প্রতি প্র যাহীন্দ্র মীলহুষো নৄন্ মহঃ পার্থিবে সদনে যতস্ব ।
অধ যদেষাং পৃথুবুধ্নাস এতাস্তীর্থে নার্যঃ পৌংস্যানি তস্থুঃ ॥৬॥

প্রতি ঘোরাণামেতানাময়াসাং মরুতাং শৃণ্ব আয়তামুপব্দিঃ ।
যে মর্ত্যং পৃতনায়ন্তমূমৈর্ঋণাবানং ন পতয়ন্ত সর্গৈঃ ॥৭॥

ত্বং মানেভ্য ইন্দ্র বিশ্বজন্যা রদা মরুদ্ভিঃ শুরুধো গোঅগ্রাঃ ।
স্তবানেভিঃ স্তবসে দেব দেবৈর্বিদ্যামেষং বৃজনং জীরদানুম্ ॥৮॥