Sukta 168

168.1

10 agastyo maitravarunih, marutah, jagati, 8-10 trishtup

य॒ज्ञाय॑ज्ञा वः सम॒ना तु॑तु॒र्वणि॒र्धियं॑धियं वो देव॒या उ॑ दधिध्वे ।
आ वो॒ऽर्वाच॑ः सुवि॒ताय॒ रोद॑स्योर्म॒हे व॑वृत्या॒मव॑से सुवृ॒क्तिभि॑ः ॥१॥

Yagyayagya vah samana tuturvanirdhiyandhiyam vo devaya u dadhidhve
A vorvachah suvitaya rodasyormahe vavrityamavase suvriktibhih

168.2

व॒व्रासो॒ न ये स्व॒जाः स्वत॑वस॒ इषं॒ स्व॑रभि॒जाय॑न्त॒ धूत॑यः ।
स॒ह॒स्रिया॑सो अ॒पां नोर्मय॑ आ॒सा गावो॒ वन्द्या॑सो॒ नोक्षण॑ः ॥२॥

Vavraso na ye svajah svatavasa isham svarabhijayanta dhutayah
Sahasriyaso apam normaya asa gavo vandyaso nokshanah

168.3

सोमा॑सो॒ न ये सु॒तास्तृ॒प्तांश॑वो हृ॒त्सु पी॒तासो॑ दु॒वसो॒ नास॑ते ।
ऐषा॒मंसे॑षु र॒म्भिणी॑व रारभे॒ हस्ते॑षु खा॒दिश्च॑ कृ॒तिश्च॒ सं द॑धे ॥३॥

Somaso na ye sutastriptanshavo hritsu pitaso duvaso nasate
Aishamanseshu rambhiniva rarabhe hasteshu khadishcha kritishcha sam dadhe

168.4

अव॒ स्वयु॑क्ता दि॒व आ वृथा॑ ययु॒रम॑र्त्या॒ः कश॑या चोदत॒ त्मना॑ ।
अ॒रे॒णव॑स्तुविजा॒ता अ॑चुच्यवुर्दृ॒ळहानि॑ चिन्म॒रुतो॒ भ्राज॑दृष्टयः ॥४॥

Ava svayukta diva a vritha yayuramartyah kashaya chodata tmana
Arenavastuvijata achuchyavurdrilahani chinmaruto bhrajadrishtayah

168.5

को वो॒ऽन्तर्म॑रुत ऋष्टिविद्युतो॒ रेज॑ति॒ त्मना॒ हन्वे॑व जि॒ह्वया॑ ।
ध॒न्व॒च्युत॑ इ॒षां न याम॑नि पुरु॒प्रैषा॑ अह॒न्यो॒३ नैत॑शः ॥५॥

Ko vontarmaruta rishtividyuto rejati tmana hanveva jihvaya
Dhanvachyuta isham na yamani purupraisha ahanyo3 naitashah

168.6

क्व॑ स्विद॒स्य रज॑सो म॒हस्परं॒ क्वाव॑रं मरुतो॒ यस्मि॑न्नाय॒य ।
यच्च्या॒वय॑थ विथु॒रेव॒ संहि॑तं॒ व्यद्रि॑णा पतथ त्वे॒षम॑र्ण॒वम् ॥६॥

Kva svidasya rajaso mahasparam kvavaram maruto yasminnayaya
Yachchyavayatha vithureva sanhitam vyadrina patatha tveshamarnavam

168.7

सा॒तिर्न वोऽम॑वती॒ स्व॑र्वती त्वे॒षा विपा॑का मरुत॒ः पिपि॑ष्वती ।
भ॒द्रा वो॑ रा॒तिः पृ॑ण॒तो न दक्षि॑णा पृथु॒ज्रयी॑ असु॒र्ये॑व॒ जञ्ज॑ती ॥७॥

Satirna vomavati svarvati tvesha vipaka marutah pipishvati
Bhadra vo ratih prinato na dakshina prithujrayi asuryeva janjati

168.8

प्रति॑ ष्टोभन्ति॒ सिन्ध॑वः प॒विभ्यो॒ यद॒भ्रियां॒ वाच॑मुदी॒रय॑न्ति ।
अव॑ स्मयन्त वि॒द्युत॑ः पृथि॒व्यां यदी॑ घृ॒तं म॒रुत॑ः प्रुष्णु॒वन्ति॑ ॥८॥

Prati shtobhanti sindhavah pavibhyo yadabhriyam vachamudirayanti
Ava smayanta vidyutah prithivyam yadi ghritam marutah prushnuvanti

168.9

असू॑त॒ पृश्नि॑र्मह॒ते रणा॑य त्वे॒षम॒यासां॑ म॒रुता॒मनी॑कम् ।
ते स॑प्स॒रासो॑ऽजनय॒न्ताभ्व॒मादित् स्व॒धामि॑षि॒रां पर्य॑पश्यन् ॥९॥

Asuta prishnirmahate ranaya tveshamayasam marutamanikam
Te sapsarasojanayantabhvamadit svadhamishiram paryapashyan

168.10

ए॒ष व॒ः स्तोमो॑ मरुत इ॒यं गीर्मा॑न्दा॒र्यस्य॑ मा॒न्यस्य॑ का॒रोः ।
एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुम् ॥१०॥

Esha vah stomo maruta iyam girmandaryasya manyasya karoh
Esha yasishta tanve vayam vidyamesham vrijanam jiradanum