Sukta 167

167.1

11 agastyo maitravarunih, 1 indrah, 2-11marutah, trishtup, (10purastajjyotih, )

स॒हस्रं॑ त इन्द्रो॒तयो॑ नः स॒हस्र॒मिषो॑ हरिवो गू॒र्तत॑माः ।
स॒हस्रं॒ रायो॑ माद॒यध्यै॑ सह॒स्रिण॒ उप॑ नो यन्तु॒ वाजा॑ः ॥१॥

Sahasram ta indrotayo nah sahasramisho harivo gurtatamah
Sahasram rayo madayadhyai sahasrina upa no yantu vajah

आ नोऽवो॑भिर्म॒रुतो॑ या॒न्त्वच्छा॒ ज्येष्ठे॑भिर्वा बृ॒हद् दि॑वैः सुमा॒याः ।
अध॒ यदे॑षां नि॒युत॑ः पर॒माः स॑मु॒द्रस्य॑ चिद् ध॒नय॑न्त पा॒रे ॥२॥

A novobhirmaruto yantvachchha jyeshthebhirva brihad divaih sumayah
Adha yadesham niyutah paramah samudrasya chid dhanayanta pare

मि॒म्यक्ष॒ येषु॒ सुधि॑ता घृ॒ताची॒ हिर॑ण्यनिर्णि॒गुप॑रा॒ न ऋ॒ष्टिः ।
गुहा॒ चर॑न्ती॒ मनु॑षो॒ न योषा॑ स॒भाव॑ती विद॒थ्ये॑व॒ सं वाक् ॥३॥

Mimyaksha yeshu sudhita ghritachi hiranyanirnigupara na rishtih
Guha charanti manusho na yosha sabhavati vidathyeva sam vak

परा॑ शु॒भ्रा अ॒यासो॑ य॒व्या सा॑धार॒ण्येव॑ म॒रुतो॑ मिमिक्षुः ।
न रो॑द॒सी अप॑ नुदन्त घो॒रा जु॒षन्त॒ वृधं॑ स॒ख्याय॑ दे॒वाः ॥४॥

Para shubhra ayaso yavya sadharanyeva maruto mimikshuh
Na rodasi apa nudanta ghora jushanta vridham sakhyaya devah

जोष॒द् यदी॑मसु॒र्या॑ स॒चध्यै॒ विषि॑तस्तुका रोद॒सी नृ॒मणा॑ः ।
आ सू॒र्येव॑ विध॒तो रथं॑ गात् त्वे॒षप्र॑तीका॒ नभ॑सो॒ नेत्या ॥५॥

Joshad yadimasurya sachadhyai vishitastuka rodasi nrimanah
A suryeva vidhato ratham gat tveshapratika nabhaso netya

आस्था॑पयन्त युव॒तिं युवा॑नः शु॒भे निमि॑श्लां वि॒दथे॑षु प॒ज्राम् ।
अ॒र्को यद् वो॑ मरुतो ह॒विष्मा॒न् गाय॑द् गा॒थं सु॒तसो॑मो दुव॒स्यन् ॥६॥

Asthapayanta yuvatim yuvanah shubhe nimishlam vidatheshu pajram
Arko yad vo maruto havishman gayad gatham sutasomo duvasyan

प्र तं वि॑वक्मि॒ वक्म्यो॒ य ए॑षां म॒रुतां॑ महि॒मा स॒त्यो अस्ति॑ ।
सचा॒ यदीं॒ वृष॑मणा अहं॒युः स्थि॒रा चि॒ज्जनी॒र्वह॑ते सुभा॒गाः ॥७॥

Pra tam vivakmi vakmyo ya esham marutam mahima satyo asti
Sacha yadim vrishamana ahanyuh sthira chijjanirvahate subhagah

पान्ति॑ मि॒त्रावरु॑णावव॒द्याच्चय॑त ईमर्य॒मो अप्र॑शस्तान् ।
उ॒त च्य॑वन्ते॒ अच्यु॑ता ध्रु॒वाणि॑ वावृ॒ध ईं॑ मरुतो॒ दाति॑वारः ॥८॥

Panti mitravarunavavadyachchayata imaryamo aprashastan
Uta chyavante achyuta dhruvani vavridha im maruto dativarah

न॒ही नु वो॑ मरुतो॒ अन्त्य॒स्मे आ॒रात्ता॑च्चि॒च्छव॑सो॒ अन्त॑मा॒पुः ।
ते धृ॒ष्णुना॒ शव॑सा शूशु॒वांसो ऽर्णो॒ न द्वेषो॑ धृष॒ता परि॑ ष्ठुः ॥९॥

Nahi nu vo maruto antyasme arattachchichchhavaso antamapuh
Te dhrishnuna shavasa shushuvanso rno na dvesho dhrishata pari shthuh

व॒यम॒द्येन्द्र॑स्य॒ प्रेष्ठा॑ व॒यं श्वो वो॑चेमहि सम॒र्ये ।
व॒यं पु॒रा महि॑ च नो॒ अनु॒ द्यून् तन्न॑ ऋभु॒क्षा न॒रामनु॑ ष्यात् ॥१०॥

Vayamadyendrasya preshtha vayam shvo vochemahi samarye
Vayam pura mahi cha no anu dyun tanna ribhuksha naramanu shyat

ए॒ष व॒ः स्तोमो॑ मरुत इ॒यं गीर्मा॑न्दा॒र्यस्य॑ मा॒न्यस्य॑ का॒रोः ।
एषा या॑सीष्ट त॒न्वे॑ व॒यां वि॒द्यामे॒षं वृ॒जनं॑ जी॒रदा॑नुम् ॥११॥

Esha vah stomo maruta iyam girmandaryasya manyasya karoh
Esha yasishta tanve vayam vidyamesham vrijanam jiradanum