সূক্ত 166

166.1

১৫ অগস্ত্যো মৈত্রাবরুণিঃ । মরুতঃ। জগতী, ১৪-১৫ ত্রিষ্টুপ্।

তন্নু বোচাম রভসায় জন্মনে পূর্বং মহিত্বং বৃষভস্য কেতবে ।
ঐধেব যামন্ মরুতস্তুবিষ্বণো যুধেব শক্রাস্তবিষাণি কর্তন ॥১॥

নিত্যং ন সূনুং মধু বিভ্রত উপ ক্রীলন্তি ক্রীলা বিদথেষু ঘৃষ্বয়ঃ ।
নক্ষন্তি রুদ্রা অবসা নমস্বিনং ন মর্ধন্তি স্বতবসো হবিষ্কৃতম্ ॥২॥

যস্মা ঊমাসো অমৃতা অরাসত রায়স্পোষং চ হবিষা দদাশুষে ।
উক্ষন্ত্যস্মৈ মরুতো হিতা ইব পুরূ রজাংসি পয়সা ময়োভুবঃ ॥৩॥

আ যে রজাংসি তবিষীভিরব্যত প্র ব এবাসঃ স্বয়তাসো অধ্রজন্ ।
ভয়ন্তে বিশ্বা ভুবনানি হর্ম্যা চিত্রো বো যামঃ প্রয়তাস্বৃষ্টিষু ॥৪॥

যৎ ত্বেষয়ামা নদয়ন্ত পর্বতান্ দিবো বা পৃষ্ঠং নর্যা অচুচ্যবুঃ ।
বিশ্বো বো অজ্মন্ ভয়তে বনস্পতী রথীয়ন্তীব প্র জিহীত ওষধিঃ ॥৫॥

যূয়ং ন উগ্রা মরুতঃ সুচেতুনা ঽরিষ্টগ্রামাঃ সুমতিং পিপর্তন ।
যত্রা বো দিদ্যুদ্ রদতি ক্রিবির্দতী রিণাতি পশ্বঃ সুধিতেব বর্হণা ॥৬॥

প্র স্কম্ভদেষ্ণা অনবভ্ররাধসো ঽলাতৃণাসো বিদথেষু সুষ্টুতাঃ ।
অর্চন্ত্যর্কং মদিরস্য পীতয়ে বিদুর্বীরস্য প্রথমানি পৌংস্যা ॥৭॥

শতভুজিভিস্তমভিহ্রুতেরঘাৎ পূর্ভী রক্ষতা মরুতো যমাবত ।
জনং যমুগ্রাস্তবসো বিরপ্শিনঃ পাথনা শংসাৎ তনয়স্য পুষ্টিষু ॥৮॥

বিশ্বানি ভদ্রা মরুতো রথেষু বো মিথস্পৃধ্যেব তবিষাণ্যাহিতা ।
অংসেষ্বা বঃ প্রপথেষু খাদয়ো ঽক্ষো বশ্চক্রা সময়া বি বাবৃতে ॥৯॥

ভূরীণি ভদ্রা নর্যেষু বাহুষু বক্ষস্সু রুক্মা রভসাসো অঞ্জয়ঃ ।
অংসেষ্বেতাঃ পবিষু ক্ষুরা অধি বয়ো ন পক্ষান্ ব্যনু শ্রিয়ো ধিরে ॥১০॥

মহান্তো মহ্না বিভ্বো৩ বিভূতয়ো দূরেদৃশো যে দিব্যা ইব স্তৃভিঃ ।
মন্দ্রাঃ সুজিহ্বাঃ স্বরিতার আসভিঃ সম্মিশ্লা ইন্দ্রে মরুতঃ পরিষ্টুভঃ ॥১১॥

তদ্ বঃ সুজাতা মরুতো মহিত্বনং দীর্ঘং বো দাত্রমদিতেরিব ব্রতম্ ।
ইন্দ্রশ্চন ত্যজসা বি হ্রুণাতি তজ্জনায় যস্মৈ সুকৃতে অরাধ্বম্ ॥১২॥

তদ্ বো জামিত্বং মরুতঃ পরে যুগে পুরূ যচ্ছংসমমৃতাস আবত ।
অয়া ধিয়া মনবে শ্রুষ্টিমাব্যা সাকং নরো দংসনৈরা চিকিত্রিরে ॥১৩॥

যেন দীর্ঘং মরুতঃ শূশবাম যুষ্মাকেন পরীণসা তুরাসঃ ।
আ যৎ ততনন্ বৃজনে জনাস এভির্যজ্ঞেভিস্তদভীষ্টিমশ্যাম্ ॥১৪॥

এষ বঃ স্তোমো মরুত ইয়ং গীর্মান্দার্যস্য মান্যস্য কারোঃ ।
এষা যাসীষ্ট তন্বে বয়াং বিদ্যামেষং বৃজনং জীরদানুম্ ॥১৫॥