সূক্ত 165

165.1

(১৫) ১,২,৪,৬,৮,১০-১২ ইন্দ্রঃ, ৩,৫,৭,৯ মরুতঃ, ১৩-১৫ অগস্ত্যো মৈত্রাবরুণিঃ। মরুত্বানিন্দ্রঃ।ত্রিষ্টুপ্।

কয়া শুভা সবয়সঃ সনীলাঃ সমান্যা মরুতঃ সং মিমিক্ষুঃ ।
কয়া মতী কুত এতাস এতে ঽর্চন্তি শুষ্মং বৃষণো বসূয়া ॥১॥

কস্য ব্রহ্মাণি জুজুষুর্যুবানঃ কো অধ্বরে মরুত আ ববর্ত ।
শ্যেনাঁ ইব ধ্রজতো অন্তরিক্ষে কেন মহা মনসা রীরমাম ॥২॥

কুতস্ত্বমিন্দ্র মাহিনঃ সন্নেকো যাসি সত্পতে কিং ত ইত্থা ।
সং পৃচ্ছসে সমরাণঃ শুভানৈর্বোচেস্তন্নো হরিবো যত্তে অস্মে ॥৩॥

ব্রহ্মাণি মে মতয়ঃ শং সুতাসঃ শুষ্ম ইয়র্তি প্রভৃতো মে অদ্রিঃ ।
আ শাসতে প্রতি হর্যন্ত্যুক্থেমা হরী বহতস্তা নো অচ্ছ ॥৪॥

অতো বয়মন্তমেভির্যুজানাঃ স্বক্ষত্রেভিস্তন্ব১ শুম্ভমানাঃ ।
মহোভিরেতাঁ উপ যুজ্মহে ন্বিন্দ্র স্বধামনু হি নো বভূথ ॥৫॥

ক্ব১ স্যা বো মরুতঃ স্বধাসীদ্ যন্মামেকং সমধত্তাহিহত্যে ।
অহং হ্যু১গ্রস্তবিষস্তুবিষ্মান্ বিশ্বস্য শত্রোরনমং বধস্নৈঃ ॥৬॥

ভূরি চকর্থ যুজ্যেভিরস্মে সমানেভির্বৃষভ পৌংস্যেভিঃ ।
ভূরীণি হি কৃণবামা শবিষ্ঠেন্দ্র ক্রত্বা মরুতো যদ্ বশাম ॥৭॥

বধীং বৃত্রং মরুত ইন্দ্রিয়েণ স্বেন ভামেন তবিষো বভূবান্ ।
অহমেতা মনবে বিশ্বশ্চন্দ্রাঃ সুগা অপশ্চকর বজ্রবাহুঃ ॥৮॥

অনুত্তমা তে মঘবন্নকির্নু ন ত্বাবাঁ অস্তি দেবতা বিদানঃ ।
ন জায়মানো নশতে ন জাতো যানি করিষ্যা কৃণুহি প্রবৃদ্ধ ॥৯॥

একস্য চিন্মে বিভ্ব১স্ত্বোজো যা নু দধৃষ্বান্ কৃণবৈ মনীষা ।
অহং হ্যু১গ্রো মরুতো বিদানো যানি চ্যবমিন্দ্র ইদীশ এষাম্ ॥১০॥

অমন্দন্মা মরুতঃ স্তোমো অত্র যন্মে নরঃ শ্রুত্যং ব্রহ্ম চক্র ।
ইন্দ্রায় বৃষ্ণে সুমখায় মহ্যং সখ্যে সখায়স্তন্বে তনূভিঃ ॥১১॥

এবেদেতে প্রতি মা রোচমানা অনেদ্যঃ শ্রব এষো দধানাঃ ।
সংচক্ষ্যা মরুতশ্চন্দ্রবর্ণা অচ্ছান্ত মে ছদয়াথা চ নূনম্ ॥১২॥

কো ন্বত্র মরুতো মামহে বঃ প্র যাতন সখীঁরচ্ছা সখায়ঃ ।
মন্মানি চিত্রা অপিবাতয়ন্ত এষাং ভূত নবেদা ম ঋতানাম্ ॥১৩॥

আ যদ্ দুবস্যাদ্ দুবসে ন কারুরস্মাঞ্চক্রে মান্যস্য মেধা ।
ও ষু বর্ত্ত মরুতো বিপ্রমচ্ছেমা ব্রহ্মাণি জরিতা বো অর্চৎ ॥১৪॥

এষ বঃ স্তোমো মরুত ইয়ং গীর্মান্দার্যস্য মান্যস্য কারোঃ ।
এষা যাসীষ্ট তন্বে বয়াং বিদ্যামেষং বৃজনং জীরদানুম্ ॥১৫॥