সূক্ত 16

16.1

৯ মেধাতিথিঃকাণ্বঃ। ইন্দ্রঃ।গায়ত্রী।

আ ত্বা বহন্তু হরয়ো বৃষণং সোমপীতয়ে । ইন্দ্র ত্বা সূরচক্ষসঃ ॥১॥

ইমা ধানা ঘৃতস্নুবো হরী ইহোপ বক্ষতঃ । ইন্দ্রং সুখতমে রথে ॥২॥

ইন্দ্রং প্রাতর্হবামহ ইন্দ্রং প্রয়ত্যধ্বরে । ইন্দ্রং সোমস্য পীতয়ে ॥৩॥

উপ নঃ সুতমা গহি হরিভিরিন্দ্র কেশিভিঃ । সুতে হি ত্বা হবামহে ॥৪॥

সেমং নঃ স্তোমমা গহ্যুপেদং সবনং সুতম্ । গৌরো ন তৃষিতঃ পিব ॥৫॥

ইমে সোমাস ইন্দবঃ সুতাসো অধি বর্হিষি । তাঁ ইন্দ্র সহসে পিব ॥৬॥

অয়ং তে স্তোমো অগ্রিয়ো হৃদিস্পৃগস্তু শংতমঃ । অথা সোমং সুতং পিব ॥৭॥

বিশ্বমিত্সবনং সুতমিন্দ্রো মদায় গচ্ছতি । বৃত্রহা সোমপীতয়ে ॥৮॥

সেমং নঃ কামমা পৃণ গোভিরশ্বৈঃ শতক্রতো । স্তবাম ত্বা স্বাধ্যঃ ॥৯॥