Sukta 16

16.1

9 medhatithihkanvah, indrah, gayatri

आ त्वा॑ वहन्तु॒ हर॑यो॒ वृष॑णं॒ सोम॑पीतये । इन्द्र॑ त्वा॒ सूर॑चक्षसः ॥१॥

A tva vahantu harayo vrishanam somapitaye, indra tva surachakshasah

इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः । इन्द्रं॑ सु॒खत॑मे॒ रथे॑ ॥२॥

Ima dhana ghritasnuvo hari ihopa vakshatah, indram sukhatame rathe

इन्द्रं॑ प्रा॒तर्ह॑वामह॒ इन्द्रं॑ प्रय॒त्य॑ध्व॒रे । इन्द्रं॒ सोम॑स्य पी॒तये॑ ॥३॥

Indram pratarhavamaha indram prayatyadhvare, indram somasya pitaye

उप॑ नः सु॒तमा ग॑हि॒ हरि॑भिरिन्द्र के॒शिभि॑ः । सु॒ते हि त्वा॒ हवा॑महे ॥४॥

Upa nah sutama gahi haribhirindra keshibhih, sute hi tva havamahe

सेमं न॒ः स्तोम॒मा ग॒ह्युपे॒दं सव॑नं सु॒तम् । गौ॒रो न तृ॑षि॒तः पि॑ब ॥५॥

Semam nah stomama gahyupedam savanam sutam, gauro na trishitah piba

इ॒मे सोमा॑स॒ इन्द॑वः सु॒तासो॒ अधि॑ ब॒र्हिषि॑ । ताँ इ॑न्द्र॒ सह॑से पिब ॥६॥

Ime somasa indavah sutaso adhi barhishi, tam indra sahase piba

अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः । अथा॒ सोमं॑ सु॒तं पि॑ब ॥७॥

Ayam te stomo agriyo hridisprigastu shantamah, atha somam sutam piba

विश्व॒मित्सव॑नं सु॒तमिन्द्रो॒ मदा॑य गच्छति । वृ॒त्र॒हा सोम॑पीतये ॥८॥

Vishvamitsavanam sutamindro madaya gachchhati, vritraha somapitaye

सेमं न॒ः काम॒मा पृ॑ण॒ गोभि॒रश्वै॑ः शतक्रतो । स्तवा॑म त्वा स्वा॒ध्य॑ः ॥९॥

Semam nah kamama prina gobhirashvaih shatakrato, stavama tva svadhyah