Sukta 17

17.1

9 medhatithih kanvah, indravarunau, gayatri, 4-5 padanichrit (5 hrasiyasi va) gayatri

इन्द्रा॒वरु॑णयोर॒हं स॒म्राजो॒रव॒ आ वृ॑णे । ता नो॑ मृळात ई॒दृशे॑ ॥१॥

Indravarunayoraham samrajorava a vrine, ta no mrilata idrishe

गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः । ध॒र्तारा॑ चर्षणी॒नाम् ॥२॥

Gantara hi sthovase havam viprasya mavatah, dhartara charshaninam

अ॒नु॒का॒मं त॑र्पयेथा॒मिन्द्रा॑वरुण रा॒य आ । ता वां॒ नेदि॑ष्ठमीमहे ॥३॥

Anukamam tarpayethamindravaruna raya a, ta vam nedishthamimahe

यु॒वाकु॒ हि शची॑नां यु॒वाकु॑ सुमती॒नाम् । भू॒याम॑ वाज॒दाव्ना॑म् ॥४॥

Yuvaku hi shachinam yuvaku sumatinam, bhuyama vajadavnam

इन्द्र॑ः सहस्र॒दाव्नां॒ वरु॑ण॒ः शंस्या॑नाम् । क्रतु॑र्भवत्यु॒क्थ्य॑ः ॥५॥

Indrah sahasradavnam varunah shansyanam, kraturbhavatyukthyah

तयो॒रिदव॑सा व॒यं स॒नेम॒ नि च॑ धीमहि । स्यादु॒त प्र॒रेच॑नम् ॥६॥

Tayoridavasa vayam sanema ni cha dhimahi, syaduta prarechanam

इन्द्रा॑वरुण वाम॒हं हु॒वे चि॒त्राय॒ राध॑से । अ॒स्मान्त्सु जि॒ग्युष॑स्कृतम् ॥७॥

Indravaruna vamaham huve chitraya radhase, asmantsu jigyushaskritam

इन्द्रा॑वरुण॒ नू नु वां॒ सिषा॑सन्तीषु धी॒ष्वा । अ॒स्मभ्यं॒ शर्म॑ यच्छतम् ॥८॥

Indravaruna nu nu vam sishasantishu dhishva, asmabhyam sharma yachchhatam

प्र वा॑मश्नोतु सुष्टु॒तिरिन्द्रा॑वरुण॒ यां हु॒वे । यामृ॒धाथे॑ स॒धस्तु॑तिम् ॥९॥

Pra vamashnotu sushtutirindravaruna yam huve, yamridhathe sadhastutim