সূক্ত 152

152.1

৭ দীর্ঘতমা ঔচথ্যঃ। মিত্রাবরুণৌ। ত্রিষ্টুপ্।

যুবং বস্ত্রাণি পীবসা বসাথে যুবোরচ্ছিদ্রা মন্তবো হ সর্গাঃ ।
অবাতিরতমনৃতানি বিশ্ব ঋতেন মিত্রাবরুণা সচেথে ॥১॥

152.2

এতচ্চন ত্বো বি চিকেতদেষাং সত্যো মন্ত্রঃ কবিশস্ত ঋঘাবান্ ।
ত্রিরশ্রিং হন্তি চতুরশ্রিরুগ্রো দেবনিদো হ প্রথমা অজূর্যন্ ॥২॥

152.3

অপাদেতি প্রথমা পদ্বতীনাং কস্তদ্ বাং মিত্রাবরুণা চিকেত ।
গর্ভো ভারং ভরত্যা চিদস্য ঋতং পিপর্ত্যনৃতং নি তারীৎ ॥৩॥

152.4

প্রয়ন্তমিৎ পরি জারং কনীনাং পশ্যামসি নোপনিপদ্যমানম্ ।
অনবপৃগ্ণা বিততা বসানং প্রিয়ং মিত্রস্য বরুণস্য ধাম ॥৪॥

152.5

অনশ্বো জাতো অনভীশুরর্বা কনিক্রদৎ পতয়দূর্ধ্বসানুঃ ।
অচিত্তং ব্রহ্ম জুজুষুর্যুবানঃ প্র মিত্রে ধাম বরুণে গৃণন্তঃ ॥৫॥

152.6

আ ধেনবো মামতেয়মবন্তীর্ব্রহ্মপ্রিয়ং পীপয়ন্ ত্সস্মিন্নূধন্ ।
পিত্বো ভিক্ষেত বয়ুনানি বিদ্বানাসাবিবাসন্নদিতিমুরুষ্যেৎ ॥৬॥

152.7

আ বাং মিত্রাবরুণা হব্যজুষ্টিং নমসা দেবাববসা ববৃত্যাম্ ।
অস্মাকং ব্রহ্ম পৃতনাসু সহ্যা অস্মাকং বৃষ্টির্দিব্যা সুপারা ॥৭॥