সূক্ত 153

153.1

৪ দীর্ঘতমা ঔচথ্যঃ। মিত্রাবরুণৌ। ত্রিষ্টুপ্।

যজামহে বাং মহঃ সজোষা হব্যেভির্মিত্রাবরুণা নমোভিঃ ।
ঘৃতৈর্ঘৃতস্নূ অধ যদ্ বামস্মে অধ্বর্যবো ন ধীতিভির্ভরন্তি ॥১॥

153.2

প্রস্তুতির্বাং ধাম ন প্রয়ুক্তিরয়ামি মিত্রাবরুণা সুবৃক্তিঃ ।
অনক্তি যদ্ বাং বিদথেষু হোতা সুম্নং বাং সূরির্বৃষণাবিয়ক্ষন্ ॥২॥

153.3

পীপায় ধেনুরদিতির্ঋতায় জনায় মিত্রাবরুণা হবির্দে ।
হিনোতি যদ্ বাং বিদথে সপর্যন্ ত্স রাতহব্যো মানুষো ন হোতা ॥৩॥

153.4

উত বাং বিক্ষু মদ্যাস্বন্ধো গাব আপশ্চ পীপয়ন্ত দেবীঃ ।
উতো নো অস্য পূর্ব্যঃ পতির্দন্ বীতং পাতং পয়স উস্রিয়ায়াঃ ॥৪॥