Sukta 153

153.1

4 dirghatama auchathyah, mitravarunau, trishtup

यजा॑महे वां म॒हः स॒जोषा॑ ह॒व्येभि॑र्मित्रावरुणा॒ नमो॑भिः ।
घृ॒तैर्घृ॑तस्नू॒ अध॒ यद् वा॑म॒स्मे अ॑ध्व॒र्यवो॒ न धी॒तिभि॒र्भर॑न्ति ॥१॥

Yajamahe vam mahah sajosha havyebhirmitravaruna namobhih
Ghritairghritasnu adha yad vamasme adhvaryavo na dhitibhirbharanti

153.2

प्रस्तु॑तिर्वां॒ धाम॒ न प्रयु॑क्ति॒रया॑मि मित्रावरुणा सुवृ॒क्तिः ।
अ॒नक्ति॒ यद् वां॑ वि॒दथे॑षु॒ होता॑ सु॒म्नं वां॑ सू॒रिर्वृ॑षणा॒विय॑क्षन् ॥२॥

Prastutirvam dhama na prayuktirayami mitravaruna suvriktih
Anakti yad vam vidatheshu hota sumnam vam surirvrishanaviyakshan

153.3

पी॒पाय॑ धे॒नुरदि॑तिर्ऋ॒ताय॒ जना॑य मित्रावरुणा हवि॒र्दे ।
हि॒नोति॒ यद् वां॑ वि॒दथे॑ सप॒र्यन् त्स रा॒तह॑व्यो॒ मानु॑षो॒ न होता॑ ॥३॥

Pipaya dhenuraditirritaya janaya mitravaruna havirde
Hinoti yad vam vidathe saparyan tsa ratahavyo manusho na hota

153.4

उ॒त वां॑ वि॒क्षु मद्या॒स्वन्धो॒ गाव॒ आप॑श्च पीपयन्त दे॒वीः ।
उ॒तो नो॑ अ॒स्य पू॒र्व्यः पति॒र्दन् वी॒तं पा॒तं पय॑स उ॒स्रिया॑याः ॥४॥

Uta vam vikshu madyasvandho gava apashcha pipayanta devih
Uto no asya purvyah patirdan vitam patam payasa usriyayah