Sukta 152

152.1

7 dirghatama auchathyah, mitravarunau, trishtup

यु॒वं वस्त्रा॑णि पीव॒सा व॑साथे यु॒वोरच्छि॑द्रा॒ मन्त॑वो ह॒ सर्गा॑ः ।
अवा॑तिरत॒मनृ॑तानि॒ विश्व॑ ऋ॒तेन॑ मित्रावरुणा सचेथे ॥१॥

Yuvam vastrani pivasa vasathe yuvorachchhidra mantavo ha sargah
Avatiratamanritani vishva ritena mitravaruna sachethe

ए॒तच्च॒न त्वो॒ वि चि॑केतदेषां स॒त्यो मन्त्र॑ः कविश॒स्त ऋघा॑वान् ।
त्रि॒रश्रिं॑ हन्ति॒ चतु॑रश्रिरु॒ग्रो दे॑व॒निदो॒ ह प्र॑थ॒मा अ॑जूर्यन् ॥२॥

Etachchana tvo vi chiketadesham satyo mantrah kavishasta righavan
Trirashrim hanti chaturashrirugro devanido ha prathama ajuryan

अ॒पादे॑ति प्रथ॒मा प॒द्वती॑नां॒ कस्तद् वां॑ मित्रावरु॒णा चि॑केत ।
गर्भो॑ भा॒रं भ॑र॒त्या चि॑दस्य ऋ॒तं पिप॒र्त्यनृ॑तं॒ नि ता॑रीत् ॥३॥

Apadeti prathama padvatinam kastad vam mitravaruna chiketa
Garbho bharam bharatya chidasya ritam pipartyanritam ni tarit

प्र॒यन्त॒मित् परि॑ जा॒रं क॒नीनां॒ पश्या॑मसि॒ नोप॑नि॒पद्य॑मानम् ।
अन॑वपृग्णा॒ वित॑ता॒ वसा॑नं प्रि॒यं मि॒त्रस्य॒ वरु॑णस्य॒ धाम॑ ॥४॥

Prayantamit pari jaram kaninam pashyamasi nopanipadyamanam
Anavaprigna vitata vasanam priyam mitrasya varunasya dhama

अ॒न॒श्वो जा॒तो अ॑नभी॒शुरर्वा॒ कनि॑क्रदत् पतयदू॒र्ध्वसा॑नुः ।
अ॒चित्तं॒ ब्रह्म॑ जुजुषु॒र्युवा॑न॒ः प्र मि॒त्रे धाम॒ वरु॑णे गृ॒णन्त॑ः ॥५॥

Anashvo jato anabhishurarva kanikradat patayadurdhvasanuh
Achittam brahma jujushuryuvanah pra mitre dhama varune grinantah

आ धे॒नवो॑ मामते॒यमव॑न्तीर्ब्रह्म॒प्रियं॑ पीपय॒न् त्सस्मि॒न्नूध॑न् ।
पि॒त्वो भि॑क्षेत व॒युना॑नि वि॒द्वाना॒साविवा॑स॒न्नदि॑तिमुरुष्येत् ॥६॥

A dhenavo mamateyamavantirbrahmapriyam pipayan tsasminnudhan
Pitvo bhiksheta vayunani vidvanasavivasannaditimurushyet

आ वां॑ मित्रावरुणा ह॒व्यजु॑ष्टिं॒ नम॑सा देवा॒वव॑सा ववृत्याम् ।
अ॒स्माकं॒ ब्रह्म॒ पृत॑नासु सह्या अ॒स्माकं॑ वृ॒ष्टिर्दि॒व्या सु॑पा॒रा ॥७॥

A vam mitravaruna havyajushtim namasa devavavasa vavrityam
Asmakam brahma pritanasu sahya asmakam vrishtirdivya supara