Sukta 151

151.1

9 dirghatama auchathyah, 1 mitrah, 2-9 mitravarunau, jagati

मि॒त्रं न यं शिम्या॒ गोषु॑ ग॒व्यव॑ः स्वा॒ध्यो॑ वि॒दथे॑ अ॒प्सु जीज॑नन् ।
अरे॑जेतां॒ रोद॑सी॒ पाज॑सा गि॒रा प्रति॑ प्रि॒यं य॑ज॒तं ज॒नुषा॒मव॑ः ॥१॥

Mitram na yam shimya goshu gavyavah svadhyo vidathe apsu jijanan
Arejetam rodasi pajasa gira prati priyam yajatam janushamavah

151.2

यद्ध॒ त्यद् वां॑ पुरुमी॒ळहस्य॑ सो॒मिन॒ः प्र मि॒त्रासो॒ न द॑धि॒रे स्वा॒भुव॑ः ।
अध॒ क्रतुं॑ विदतं गा॒तुमर्च॑त उ॒त श्रु॑तं वृषणा प॒स्त्या॑वतः ॥२॥

Yaddha tyad vam purumilahasya sominah pra mitraso na dadhire svabhuvah
Adha kratum vidatam gatumarchata uta shrutam vrishana pastyavatah

151.3

आ वां॑ भूषन् क्षि॒तयो॒ जन्म॒ रोद॑स्योः प्र॒वाच्यं॑ वृषणा॒ दक्ष॑से म॒हे ।
यदी॑मृ॒ताय॒ भर॑थो॒ यदर्व॑ते॒ प्र होत्र॑या॒ शिम्या॑ वीथो अध्व॒रम् ॥३॥

A vam bhushan kshitayo janma rodasyoh pravachyam vrishana dakshase mahe
Yadimritaya bharatho yadarvate pra hotraya shimya vitho adhvaram

151.4

प्र सा क्षि॒तिर॑सुर॒ या महि॑ प्रि॒य ऋता॑वानावृ॒तमा घो॑षथो बृ॒हत् ।
यु॒वं दि॒वो बृ॑ह॒तो दक्ष॑मा॒भुवं॒ गां न धु॒र्युप॑ युञ्जाथे अ॒पः ॥४॥

Pra sa kshitirasura ya mahi priya ritavanavritama ghoshatho brihat
Yuvam divo brihato dakshamabhuvam gam na dhuryupa yunjathe apah

151.5

म॒ही अत्र॑ महि॒ना वार॑मृण्वथो ऽरे॒णव॒स्तुज॒ आ सद्म॑न् धे॒नव॑ः ।
स्वर॑न्ति॒ ता उ॑प॒रता॑ति॒ सूर्य॒मा नि॒म्रुच॑ उ॒षस॑स्तक्व॒वीरि॑व ॥५॥

Mahi atra mahina varamrinvatho renavastuja a sadman dhenavah
Svaranti ta uparatati suryama nimrucha ushasastakvaviriva

151.6

आ वा॑मृ॒ताय॑ के॒शिनी॑रनूषत॒ मित्र॒ यत्र॒ वरु॑ण गा॒तुमर्च॑थः ।
अव॒ त्मना॑ सृ॒जतं॒ पिन्व॑तं॒ धियो॑ यु॒वं विप्र॑स्य॒ मन्म॑नामिरज्यथः ॥६॥

A vamritaya keshiniranushata mitra yatra varuna gatumarchathah
Ava tmana srijatam pinvatam dhiyo yuvam viprasya manmanamirajyathah

151.7

यो वां॑ य॒ज्ञैः श॑शमा॒नो ह॒ दाश॑ति क॒विर्होता॒ यज॑ति मन्म॒साध॑नः ।
उपाह॒ तं गच्छ॑थो वी॒थो अ॑ध्व॒रमच्छा॒ गिर॑ः सुम॒तिं ग॑न्तमस्म॒यू ॥७॥

Yo vam yagyaih shashamano ha dashati kavirhota yajati manmasadhanah
Upaha tam gachchhatho vitho adhvaramachchha girah sumatim gantamasmayu

151.8

यु॒वां य॒ज्ञैः प्र॑थ॒मा गोभि॑रञ्जत॒ ऋता॑वाना॒ मन॑सो॒ न प्रयु॑क्तिषु ।
भर॑न्ति वां॒ मन्म॑ना सं॒यता॒ गिरो ऽदृ॑प्यता॒ मन॑सा रे॒वदा॑शाथे ॥८॥

Yuvam yagyaih prathama gobhiranjata ritavana manaso na prayuktishu
Bharanti vam manmana sanyata giro dripyata manasa revadashathe

151.9

रे॒वद् वयो॑ दधाथे रे॒वदा॑शाथे॒ नरा॑ मा॒याभि॑रि॒तऊ॑ति॒ माहि॑नम् ।
न वां॒ द्यावोऽह॑भि॒र्नोत सिन्ध॑वो॒ न दे॑व॒त्वं प॒णयो॒ नान॑शुर्म॒घम् ॥९॥

Revad vayo dadhathe revadashathe nara mayabhiritauti mahinam
Na vam dyavohabhirnota sindhavo na devatvam panayo nanashurmagham