সূক্ত 143

143.1

৮ দীর্ঘতমা ঔচথ্যঃ। অগ্নিঃ। জগতী, ৮ ত্রিষ্টুপ্ ।

প্র তব্যসীং নব্যসীং ধীতিমগ্নয়ে বাচো মতিং সহসঃ সূনবে ভরে ।
অপাং নপাদ্ যো বসুভিঃ সহ প্রিয়ো হোতা পৃথিব্যাং ন্যসীদদৃত্বিয়ঃ ॥১॥

143.2

স জায়মানঃ পরমে ব্যোমন্যাবিরগ্নিরভবন্মাতরিশ্বনে ।
অস্য ক্রত্বা সমিধানস্য মজ্মনা প্র দ্যাবা শোচিঃ পৃথিবী অরোচয়ৎ ॥২॥

143.3

অস্য ত্বেষা অজরা অস্য ভানবঃ সুসংদৃশঃ সুপ্রতীকস্য সুদ্যুতঃ ।
ভাত্বক্ষসো অত্যক্তুর্ন সিন্ধবো ঽগ্নে রেজন্তে অসসন্তো অজরাঃ ॥৩॥

143.4

যমেরিরে ভৃগবো বিশ্ববেদসং নাভা পৃথিব্যা ভুবনস্য মজ্মনা ।
অগ্নিং তং গীর্ভির্হিনুহি স্ব আ দমে য একো বস্বো বরুণো ন রাজতি ॥৪॥

143.5

ন যো বরায় মরুতামিব স্বনঃ সেনেব সৃষ্টা দিব্যা যথাশনিঃ ।
অগ্নির্জম্ভৈস্তিগিতৈরত্তি ভর্বতি যোধো ন শত্রূন্ ত্স বনা ন্যৃঞ্জতে ॥৫॥

143.6

কুবিন্নো অগ্নিরুচথস্য বীরসদ্ বসুষ্কুবিদ্ বসুভিঃ কামমাবরৎ ।
চোদঃ কুবিৎ তুতুজ্যাৎ সাতয়ে ধিয়ঃ শুচিপ্রতীকং তময়া ধিয়া গৃণে ॥৬॥

143.7

ঘৃতপ্রতীকং ব ঋতস্য ধূর্ষদমগ্নিং মিত্রং ন সমিধান ঋঞ্জতে ।
ইন্ধানো অক্রো বিদথেষু দীদ্যচ্ছুক্রবর্ণামুদু নো যংসতে ধিয়ম্ ॥৭॥

143.8

অপ্রয়ুচ্ছন্নপ্রয়ুচ্ছদ্ভিরগ্নে শিবেভির্নঃ পায়ুভিঃ পাহি শগ্মৈঃ ।
অদব্ধেভিরদৃপিতেভিরিষ্টে ঽনিমিষদ্ভিঃ পরি পাহি নো জাঃ ॥৮॥