সূক্ত 142

142.1

১৩ দীর্ঘতমা ঔচথ্যঃ। (আপ্রীসূক্তং)-১ ইধ্মঃ সমিদ্ধোঽগ্নির্বা, ২ তনূন পাৎ, ৩ নরাশংসঃ, ৪ ইলঃ, ৫ বর্হিঃ, ৬ দেবীঃ দ্বারঃ, ৭ উষাসানক্তা ৮ দৈব্যো হোতারৌ প্রচেতসৌ, ৯ তিস্রো দেব্যঃ সরস্বতীলা ভারত্যঃ, ১০ ত্বষ্টা, ১১ বনস্পতিঃ, ১২ স্বাহা কৃতয়ঃ, ১৩ ইন্দ্রঃ। অনুষ্টুপ্।

সমিদ্ধো অগ্ন আ বহ দেবাঁ অদ্য যতস্রুচে । তন্তুং তনুষ্ব পূর্ব্যং সুতসোমায় দাশুষে ॥১॥

142.2

ঘৃতবন্তমুপ মাসি মধুমন্তং তনূনপাৎ । যজ্ঞং বিপ্রস্য মাবতঃ শশমানস্য দাশুষঃ ॥২॥

142.3

শুচিঃ পাবকো অদ্ভুতো মধ্বা যজ্ঞং মিমিক্ষতি । নরাশংসস্ত্রিরা দিবো দেবো দেবেষু যজ্ঞিয়ঃ ॥৩॥

142.4

ঈলিতো অগ্ন আ বহেন্দ্রং চিত্রমিহ প্রিয়ম্ । ইয়ং হি ত্বা মতির্মমাচ্ছা সুজিহ্ব বচ্যতে ॥৪॥

142.5

স্তৃণানাসো যতস্রুচো বর্হির্যজ্ঞে স্বধ্বরে । বৃঞ্জে দেবব্যচস্তমমিন্দ্রায় শর্ম সপ্রথঃ ॥৫॥

142.6

বি শ্রয়ন্তামৃতাবৃধঃ প্রয়ৈ দেবেভ্যো মহীঃ । পাবকাসঃ পুরুস্পৃহো দ্বারো দেবীরসশ্চতঃ ॥৬॥

142.7

আ ভন্দমানে উপাকে নক্তোষাসা সুপেশসা । যহ্বী ঋতস্য মাতরা সীদতাং বর্হিরা সুমৎ ॥৭॥

142.8

মন্দ্রজিহ্বা জুগুর্বণী হোতারা দৈব্যা কবী । যজ্ঞং নো যক্ষতামিমং সিধ্রমদ্য দিবিস্পৃশম্ ॥৮॥

142.9

শুচির্দেবেষ্বর্পিতা হোত্রা মরুত্সু ভারতী । ইলা সরস্বতী মহী বর্হিঃ সীদন্তু যজ্ঞিয়াঃ ॥৯॥

142.10

তন্নস্তুরীপমদ্ভুতং পুরু বারং পুরু ত্মনা । ত্বষ্টা পোষায় বি ষ্যতু রায়ে নাভা নো অস্ময়ুঃ ॥১০॥

142.11

অবসৃজন্নুপ ত্মনা দেবান্ যক্ষি বনস্পতে । অগ্নির্হব্যা সুষূদতি দেবো দেবেষু মেধিরঃ ॥১১॥

142.12

পূষণ্বতে মরুত্বতে বিশ্বদেবায় বায়বে । স্বাহা গায়ত্রবেপসে হব্যমিন্দ্রায় কর্তন ॥১২॥

142.13

স্বাহাকৃতান্যা গহ্যুপ হব্যানি বীতয়ে । ইন্দ্রা গহি শ্রুধী হবং ত্বাং হবন্তে অধ্বরে ॥১৩॥