সূক্ত 141

141.1

১৩ দীর্ঘতমা ঔচথ্যঃ। অগ্নিঃ। জগতী, ১২-১৩ ত্রিষ্টুপ্।

বলিত্থা তদ্ বপুষে ধায়ি দর্শতং দেবস্য ভর্গঃ সহসো যতো জনি ।
যদীমুপ হ্বরতে সাধতে মতির্ঋতস্য ধেনা অনয়ন্ত সস্রুতঃ ॥১॥

পৃক্ষো বপুঃ পিতুমান্ নিত্য আ শয়ে দ্বিতীয়মা সপ্তশিবাসু মাতৃষু ।
তৃতীয়মস্য বৃষভস্য দোহসে দশপ্রমতিং জনয়ন্ত যোষণঃ ॥২॥

নির্যদীং বুধ্নান্মহিষস্য বর্পস ঈশানাসঃ শবসা ক্রন্ত সূরয়ঃ ।
যদীমনু প্রদিবো মধ্ব আধবে গুহা সন্তং মাতরিশ্বা মথায়তি ॥৩॥

প্র যৎ পিতুঃ পরমান্নীয়তে পর্যা পৃক্ষুধো বীরুধো দংসু রোহতি ।
উভা যদস্য জনুষং যদিন্বত আদিদ্ যবিষ্ঠো অভবদ্ ঘৃণা শুচিঃ ॥৪॥

আদিন্মাতৄরাবিশদ্ যাস্বা শুচিরহিংস্যমান উর্বিয়া বি বাবৃধে ।
অনু যৎ পূর্বা অরুহৎ সনাজুবো নি নব্যসীষ্ববরাসু ধাবতে ॥৫॥

আদিদ্ধোতারং বৃণতে দিবিষ্টিষু ভগমিব পপৃচানাস ঋঞ্জতে ।
দেবান্ যৎ ক্রত্বা মজ্মনা পুরুষ্টুতো মর্তং শংসং বিশ্বধা বেতি ধায়সে ॥৬॥

বি যদস্থাদ্ যজতো বাতচোদিতো হ্বারো ন বক্বা জরণা অনাকৃতঃ ।
তস্য পত্মন্ দক্ষুষঃ কৃষ্ণজংহসঃ শুচিজন্মনো রজ আ ব্যধ্বনঃ ॥৭॥

রথো ন যাতঃ শিক্বভিঃ কৃতো দ্যামঙ্গেভিররুষেভিরীয়তে ।
আদস্য তে কৃষ্ণাসো দক্ষি সূরয়ঃ শূরস্যেব ত্বেষথাদীষতে বয়ঃ ॥৮॥

ত্বয়া হ্যগ্নে বরুণো ধৃতব্রতো মিত্রঃ শাশদ্রে অর্যমা সুদানবঃ ।
যৎ সীমনু ক্রতুনা বিশ্বথা বিভুররান্ন নেমিঃ পরিভূরজায়থাঃ ॥৯॥

ত্বমগ্নে শশমানায় সুন্বতে রত্নং যবিষ্ঠ দেবতাতিমিন্বসি ।
তং ত্বা নু নব্যং সহসো যুবন্ বয়ং ভগং ন কারে মহিরত্ন ধীমহি ॥১০॥

অস্মে রয়িং ন স্বর্থং দমূনসং ভগং দক্ষং ন পপৃচাসি ধর্ণসিম্ ।
রশ্মীঁরিব যো যমতি জন্মনী উভে দেবানাং শংসমৃত আ চ সুক্রতুঃ ॥১১॥

উত নঃ সুদ্যোত্মা জীরাশ্বো হোতা মন্দ্রঃ শৃণবচ্চন্দ্ররথঃ ।
স নো নেষন্নেষতমৈরমূরো ঽগ্নির্বামং সুবিতং বস্যো অচ্ছ ॥১২॥

অস্তাব্যগ্নিঃ শিমীবদ্ভিরর্কৈঃ সাম্রাজ্যায় প্রতরং দধানঃ ।
অমী চ যে মঘবানো বয়ং চ মিহং ন সূরো অতি নিষ্টতন্যুঃ ॥১৩॥