সূক্ত 140

140.1

১৩ দীর্ঘতমা ঔচথ্যঃ। অগ্নিঃ। জগতী, ১০ ত্রিষ্টুব্বা, ১২-১৩ ত্রিষ্টুপ্।

বেদিষদে প্রিয়ধামায় সুদ্যুতে ধাসিমিব প্র ভরা যোনিমগ্নয়ে ।
বস্ত্রেণেব বাসয়া মন্মনা শুচিং জ্যোতীরথং শুক্রবর্ণং তমোহনম্ ॥১॥

অভি দ্বিজন্মা ত্রিবৃদন্নমৃজ্যতে সংবত্সরে বাবৃধে জগ্ধমী পুনঃ ।
অন্যস্যাসা জিহ্বয়া জেন্যো বৃষা ন্য ১ন্যেন বনিনো মৃষ্ট বারণঃ ॥২॥

কৃষ্ণপ্রুতৌ বেবিজে অস্য সক্ষিতা উভা তরেতে অভি মাতরা শিশুম্ ।
প্রাচাজিহ্বং ধ্বসয়ন্তং তৃষুচ্যুতমা সাচ্যং কুপয়ং বর্ধনং পিতুঃ ॥৩॥

মুমুক্ষ্বো ৩ মনবে মানবস্যতে রঘুদ্রুবঃ কৃষ্ণসীতাস ঊ জুবঃ ।
অসমনা অজিরাসো রঘুষ্যদো বাতজূতা উপ যুজ্যন্ত আশবঃ ॥৪॥

আদস্য তে ধ্বসয়ন্তো বৃথেরতে কৃষ্ণমভ্বং মহি বর্পঃ করিক্রতঃ ।
যত্সীং মহীমবনিং প্রাভি মর্মৃশদভিশ্বসন্ ত্স্তনয়ন্নেতি নানদৎ ॥৫॥

ভূষন্ ন যোঽধি বভ্রূষু নম্নতে বৃষেব পত্নীরভ্যেতি রোরুবৎ ।
ওজায়মানস্তন্বশ্চ শুম্ভতে ভীমো ন শৃঙ্গা দবিধাব দুর্গৃভিঃ ॥৬॥

স সংস্তিরো বিষ্টিরঃ সং গৃভায়তি জানন্নেব জানতীর্নিত্য আ শয়ে ।
পুনর্বর্ধন্তে অপি যন্তি দেব্যমন্যদ্ বর্পঃ পিত্রোঃ কৃণ্বতে সচা ॥৭॥

তমগ্রুবঃ কেশিনীঃ সং হি রেভির ঊর্ধ্বাস্তস্থুর্মম্রুষীঃ প্রায়বে পুনঃ ।
তাসাং জরাং প্রমুঞ্চন্নেতি নানদদসুং পরং জনয়ঞ্জীবমস্তৃতম্ ॥৮॥

অধীবাসং পরি মাতূ রিহন্নহ তুবিগ্রেভিঃ সত্বভির্যাতি বি জ্রয়ঃ ।
বয়ো দধৎ পদ্বতে রেরিহৎ সদাঽনু শ্যেনী সচতে বর্তনীরহ ॥৯॥

অস্মাকমগ্নে মঘবত্সু দীদিহ্যধ শ্বসীবান্ বৃষভো দমূনাঃ ।
অবাস্যা শিশুমতীরদীদের্বর্মেব যুত্সু পরিজর্ভুরাণঃ ॥১০॥

ইদমগ্নে সুধিতং দুর্ধিতাদধি প্রিয়াদু চিন্মন্মনঃ প্রেয়ো অস্তু তে ।
যত্তে শুক্রং তন্বো ৩ রোচতে শুচি তেনাস্মভ্যং বনসে রত্নমা ত্বম্ ॥১১॥

রথায় নাবমুত নো গৃহায় নিত্যারিত্রাং পদ্বতীং রাস্যগ্নে ।
অস্মাকং বীরাঁ উত নো মঘোনো জনাঁশ্চ যা পারয়াচ্ছর্ম যা চ ॥১২॥

অভী নো অগ্ন উক্থমিজ্জুগুর্যা দ্যাবাক্ষামা সিন্ধবশ্চ স্বগূর্তাঃ ।
গব্যং যব্যং যন্তো দীর্ঘাহেষং বরমরুণ্যো বরন্ত ॥১৩॥