Sukta 140

140.1

13 dirghatama auchathyah, agnih, jagati, 10 trishtubva, 12-13 trishtup

वे॒दि॒षदे॑ प्रि॒यधा॑माय सु॒द्युते॑ धा॒सिमि॑व॒ प्र भ॑रा॒ योनि॑म॒ग्नये॑ ।
वस्त्रे॑णेव वासया॒ मन्म॑ना॒ शुचिं॑ ज्यो॒तीर॑थं शु॒क्रव॑र्णं तमो॒हन॑म् ॥१॥

Vedishade priyadhamaya sudyute dhasimiva pra bhara yonimagnaye
Vastreneva vasaya manmana shuchim jyotiratham shukravarnam tamohanam

140.2

अ॒भि द्वि॒जन्मा॑ त्रि॒वृदन्न॑मृज्यते संवत्स॒रे वा॑वृधे ज॒ग्धमी॒ पुन॑ः ।
अ॒न्यस्या॒सा जि॒ह्वया॒ जेन्यो॒ वृषा॒ न्य १न्येन॑ व॒निनो॑ मृष्ट वार॒णः ॥२॥

Abhi dvijanma trivridannamrijyate sanvatsare vavridhe jagdhami punah
Anyasyasa jihvaya jenyo vrisha nya 1nyena vanino mrishta varanah

140.3

कृ॒ष्ण॒प्रुतौ॑ वेवि॒जे अ॑स्य स॒क्षिता॑ उ॒भा त॑रेते अ॒भि मा॒तरा॒ शिशु॑म् ।
प्रा॒चाजि॑ह्वं ध्व॒सय॑न्तं तृषु॒च्युत॒मा साच्यं॒ कुप॑यं॒ वर्ध॑नं पि॒तुः ॥३॥

Krishnaprutau vevije asya sakshita ubha tarete abhi matara shishum
Prachajihvam dhvasayantam trishuchyutama sachyam kupayam vardhanam pituh

140.4

मु॒मु॒क्ष्वो॒ ३ मन॑वे मानवस्य॒ते र॑घु॒द्रुव॑ः कृ॒ष्णसी॑तास ऊ॒ जुव॑ः ।
अ॒स॒म॒ना अ॑जि॒रासो॑ रघु॒ष्यदो॒ वात॑जूता॒ उप॑ युज्यन्त आ॒शव॑ः ॥४॥

Mumukshvo 3 manave manavasyate raghudruvah krishnasitasa u juvah
Asamana ajiraso raghushyado vatajuta upa yujyanta ashavah

140.5

आद॑स्य॒ ते ध्व॒सय॑न्तो॒ वृथे॑रते कृ॒ष्णमभ्वं॒ महि॒ वर्प॒ः करि॑क्रतः ।
यत्सीं॑ म॒हीम॒वनिं॒ प्राभि मर्मृ॑शदभिश्व॒सन् त्स्त॒नय॒न्नेति॒ नान॑दत् ॥५॥

Adasya te dhvasayanto vritherate krishnamabhvam mahi varpah karikratah
Yatsim mahimavanim prabhi marmrishadabhishvasan tstanayanneti nanadat

140.6

भूष॒न् न योऽधि॑ ब॒भ्रूषु॒ नम्न॑ते॒ वृषे॑व॒ पत्नी॑र॒भ्ये॑ति॒ रोरु॑वत् ।
ओ॒जा॒यमा॑नस्त॒न्व॑श्च शुम्भते भी॒मो न शृङ्गा॑ दविधाव दु॒र्गृभि॑ः ॥६॥

Bhushan na yodhi babhrushu namnate vrisheva patnirabhyeti roruvat
Ojayamanastanvashcha shumbhate bhimo na shringa davidhava durgribhih

140.7

स सं॒स्तिरो॑ वि॒ष्टिर॒ः सं गृ॑भायति जा॒नन्ने॒व जा॑न॒तीर्नित्य॒ आ श॑ये ।
पुन॑र्वर्धन्ते॒ अपि॑ यन्ति दे॒व्य॑म॒न्यद् वर्प॑ः पि॒त्रोः कृ॑ण्वते॒ सचा॑ ॥७॥

Sa sanstiro vishtirah sam gribhayati jananneva janatirnitya a shaye
Punarvardhante api yanti devyamanyad varpah pitroh krinvate sacha

140.8

तम॒ग्रुव॑ः के॒शिनी॒ः सं हि रे॑भि॒र ऊ॒र्ध्वास्त॑स्थुर्म॒म्रुषी॒ः प्रायवे॒ पुन॑ः ।
तासां॑ ज॒रां प्र॑मु॒ञ्चन्ने॑ति॒ नान॑द॒दसुं॒ परं॑ ज॒नय॑ञ्जी॒वमस्तृ॑तम् ॥८॥

Tamagruvah keshinih sam hi rebhira urdhvastasthurmamrushih prayave punah
Tasam jaram pramunchanneti nanadadasum param janayanjivamastritam

140.9

अ॒धी॒वा॒सं परि॑ मा॒तू रि॒हन्नह॑ तुवि॒ग्रेभि॒ः सत्व॑भिर्याति॒ वि ज्रय॑ः ।
वयो॒ दध॑त् प॒द्वते॒ रेरि॑ह॒त् सदाऽनु॒ श्येनी॑ सचते वर्त॒नीरह॑ ॥९॥

Adhivasam pari matu rihannaha tuvigrebhih satvabhiryati vi jrayah
Vayo dadhat padvate rerihat sadanu shyeni sachate vartaniraha

140.10

अ॒स्माक॑मग्ने म॒घव॑त्सु दीदि॒ह्यध॒ श्वसी॑वान् वृष॒भो दमू॑नाः ।
अ॒वास्या॒ शिशु॑मतीरदीदे॒र्वर्मे॑व यु॒त्सु प॑रि॒जर्भु॑राणः ॥१०॥

Asmakamagne maghavatsu didihyadha shvasivan vrishabho damunah
Avasya shishumatiradidervarmeva yutsu parijarbhuranah

140.11

इ॒दम॑ग्ने॒ सुधि॑तं॒ दुर्धि॑ता॒दधि॑ प्रि॒यादु॑ चि॒न्मन्म॑न॒ः प्रेयो॑ अस्तु ते ।
यत्ते॑ शु॒क्रं त॒न्वो॒ ३ रोच॑ते॒ शुचि॒ तेना॒स्मभ्यं॑ वनसे॒ रत्न॒मा त्वम् ॥११॥

Idamagne sudhitam durdhitadadhi priyadu chinmanmanah preyo astu te
Yatte shukram tanvo 3 rochate shuchi tenasmabhyam vanase ratnama tvam

140.12

रथा॑य॒ नाव॑मु॒त नो॑ गृ॒हाय॒ नित्या॑रित्रां प॒द्वतीं॑ रास्यग्ने ।
अ॒स्माकं॑ वी॒राँ उ॒त नो॑ म॒घोनो॒ जनाँ॑श्च॒ या पा॒रया॒च्छर्म॒ या च॑ ॥१२॥

Rathaya navamuta no grihaya nityaritram padvatim rasyagne
Asmakam viram uta no maghono jananshcha ya parayachchharma ya cha

140.13

अ॒भी नो॑ अग्न उ॒क्थमिज्जु॑गुर्या॒ द्यावा॒क्षामा॒ सिन्ध॑वश्च॒ स्वगू॑र्ताः ।
गव्यं॒ यव्यं॒ यन्तो॑ दी॒र्घाहेषं॒ वर॑मरु॒ण्यो॑ वरन्त ॥१३॥

Abhi no agna ukthamijjugurya dyavakshama sindhavashcha svagurtah
Gavyam yavyam yanto dirghahesham varamarunyo varanta