Sukta 143

143.1

8 dirghatama auchathyah, agnih, jagati, 8 trishtup

प्र तव्य॑सीं॒ नव्य॑सीं धी॒तिम॒ग्नये॑ वा॒चो म॒तिं सह॑सः सू॒नवे॑ भरे ।
अ॒पां नपा॒द् यो वसु॑भिः स॒ह प्रि॒यो होता॑ पृथि॒व्यां न्यसी॑ददृ॒त्विय॑ः ॥१॥

Pra tavyasim navyasim dhitimagnaye vacho matim sahasah sunave bhare
Apam napad yo vasubhih saha priyo hota prithivyam nyasidadritviyah

143.2

स जाय॑मानः पर॒मे व्यो॑मन्या॒विर॒ग्निर॑भवन्मात॒रिश्व॑ने ।
अ॒स्य क्रत्वा॑ समिधा॒नस्य॑ म॒ज्मना॒ प्र द्यावा॑ शो॒चिः पृ॑थि॒वी अ॑रोचयत् ॥२॥

Sa jayamanah parame vyomanyaviragnirabhavanmatarishvane
Asya kratva samidhanasya majmana pra dyava shochih prithivi arochayat

143.3

अ॒स्य त्वे॒षा अ॒जरा॑ अ॒स्य भा॒नव॑ः सुसं॒दृश॑ः सु॒प्रती॑कस्य सु॒द्युत॑ः ।
भात्व॑क्षसो॒ अत्य॒क्तुर्न सिन्ध॑वो॒ ऽग्ने रे॑जन्ते॒ अस॑सन्तो अ॒जरा॑ः ॥३॥

Asya tvesha ajara asya bhanavah susandrishah supratikasya sudyutah
Bhatvakshaso atyakturna sindhavo gne rejante asasanto ajarah

143.4

यमे॑रि॒रे भृग॑वो वि॒श्ववे॑दसं॒ नाभा॑ पृथि॒व्या भुव॑नस्य म॒ज्मना॑ ।
अ॒ग्निं तं गी॒र्भिर्हि॑नुहि॒ स्व आ दमे॒ य एको॒ वस्वो॒ वरु॑णो॒ न राज॑ति ॥४॥

Yamerire bhrigavo vishvavedasam nabha prithivya bhuvanasya majmana
Agnim tam girbhirhinuhi sva a dame ya eko vasvo varuno na rajati

143.5

न यो वरा॑य म॒रुता॑मिव स्व॒नः सेने॑व सृ॒ष्टा दि॒व्या यथा॒शनि॑ः ।
अ॒ग्निर्जम्भै॑स्तिगि॒तैर॑त्ति॒ भर्व॑ति यो॒धो न शत्रू॒न् त्स वना॒ न्यृ॑ञ्जते ॥५॥

Na yo varaya marutamiva svanah seneva srishta divya yathashanih
Agnirjambhaistigitairatti bharvati yodho na shatrun tsa vana nyrinjate

143.6

कु॒विन्नो॑ अ॒ग्निरु॒चथ॑स्य॒ वीरस॒द् वसु॑ष्कु॒विद् वसु॑भि॒ः काम॑मा॒वर॑त् ।
चो॒दः कु॒वित् तु॑तु॒ज्यात् सा॒तये॒ धिय॒ः शुचि॑प्रतीकं॒ तम॒या धि॒या गृ॑णे ॥६॥

Kuvinno agniruchathasya virasad vasushkuvid vasubhih kamamavarat
Chodah kuvit tutujyat sataye dhiyah shuchipratikam tamaya dhiya grine

143.7

घृ॒तप्र॑तीकं व ऋ॒तस्य॑ धू॒र्षद॑म॒ग्निं मि॒त्रं न स॑मिधा॒न ऋ॑ञ्जते ।
इन्धा॑नो अ॒क्रो वि॒दथे॑षु॒ दीद्य॑च्छु॒क्रव॑र्णा॒मुदु॑ नो यंसते॒ धिय॑म् ॥७॥

Ghritapratikam va ritasya dhurshadamagnim mitram na samidhana rinjate
Indhano akro vidatheshu didyachchhukravarnamudu no yansate dhiyam

143.8

अप्र॑युच्छ॒न्नप्र॑युच्छद्भिरग्ने शि॒वेभि॑र्नः पा॒युभि॑ः पाहि श॒ग्मैः ।
अद॑ब्धेभि॒रदृ॑पितेभिरि॒ष्टे ऽनि॑मिषद्भि॒ः परि॑ पाहि नो॒ जाः ॥८॥

Aprayuchchhannaprayuchchhadbhiragne shivebhirnah payubhih pahi shagmaih
Adabdhebhiradripitebhirishte nimishadbhih pari pahi no jah