Sukta 144

144.1

7 dirghatama auchathyah, agnih, jagati

एति॒ प्र होता॑ व्र॒तम॑स्य मा॒ययो॒र्ध्वां दधा॑न॒ः शुचि॑पेशसं॒ धिय॑म् ।
अ॒भि स्रुच॑ः क्रमते दक्षिणा॒वृतो॒ या अ॑स्य॒ धाम॑ प्रथ॒मं ह॒ निंस॑ते ॥१॥

Eti pra hota vratamasya mayayordhvam dadhanah shuchipeshasam dhiyam
Abhi sruchah kramate dakshinavrito ya asya dhama prathamam ha ninsate

144.2

अ॒भीमृ॒तस्य॑ दो॒हना॑ अनूषत॒ योनौ॑ दे॒वस्य॒ सद॑ने॒ परी॑वृताः ।
अ॒पामु॒पस्थे॒ विभृ॑तो॒ यदाव॑स॒दध॑ स्व॒धा अ॑धय॒द् याभि॒रीय॑ते ॥२॥

Abhimritasya dohana anushata yonau devasya sadane parivritah
Apamupasthe vibhrito yadavasadadha svadha adhayad yabhiriyate

144.3

युयू॑षत॒ः सव॑यसा॒ तदिद् वपु॑ः समा॒नमर्थं॑ वि॒तरि॑त्रता मि॒थः ।
आदीं॒ भगो॒ न हव्य॒ः सम॒स्मदा वोह्लु॒र्न र॒श्मीन् त्सम॑यंस्त॒ सार॑थिः ॥३॥

Yuyushatah savayasa tadid vapuh samanamartham vitaritrata mithah
Adim bhago na havyah samasmada vohlurna rashmin tsamayansta sarathih

144.4

यमीं॒ द्वा सव॑यसा सप॒र्यत॑ः समा॒ने योना॑ मिथु॒ना समो॑कसा ।
दिवा॒ न नक्तं॑ पलि॒तो युवा॑जनि पु॒रू चर॑न्न॒जरो॒ मानु॑षा यु॒गा ॥४॥

Yamim dva savayasa saparyatah samane yona mithuna samokasa
Diva na naktam palito yuvajani puru charannajaro manusha yuga

144.5

तमीं॑ हिन्वन्ति धी॒तयो॒ दश॒ व्रिशो॑ दे॒वं मर्ता॑स ऊ॒तये॑ हवामहे ।
धनो॒रधि॑ प्र॒वत॒ आ स ऋ॑ण्वत्यभि॒व्रज॑द्भिर्व॒युना॒ नवा॑धित ॥५॥

Tamim hinvanti dhitayo dasha vrisho devam martasa utaye havamahe
Dhanoradhi pravata a sa rinvatyabhivrajadbhirvayuna navadhita

144.6

त्वं ह्य॑ग्ने दि॒व्यस्य॒ राज॑सि॒ त्वं पार्थि॑वस्य पशु॒पा इ॑व॒ त्मना॑ ।
एनी॑ त ए॒ते बृ॑ह॒ती अ॑भि॒श्रिया॑ हिर॒ण्ययी॒ वक्व॑री ब॒र्हिरा॑शाते ॥६॥

Tvam hyagne divyasya rajasi tvam parthivasya pashupa iva tmana
Eni ta ete brihati abhishriya hiranyayi vakvari barhirashate

144.7

अग्ने॑ जु॒षस्व॒ प्रति॑ हर्य॒ तद् वचो॒ मन्द्र॒ स्वधा॑व॒ ऋत॑जात॒ सुक्र॑तो ।
यो वि॒श्वत॑ः प्र॒त्यङ्ङसि॑ दर्श॒तो र॒ण्वः संदृ॑ष्टौ पितु॒माँ इ॑व॒ क्षय॑ः ॥७॥

Agne jushasva prati harya tad vacho mandra svadhava ritajata sukrato
Yo vishvatah pratyanngasi darshato ranvah sandrishtau pitumam iva kshayah