Sukta 145

145.1

5 dirghatama auchathyah, agnih, jagati, 5 trishtup

तं पृ॑च्छता॒ स ज॑गामा॒ स वे॑द॒ स चि॑कि॒त्वाँ ई॑यते॒ सा न्वी॑यते ।
तस्मि॑न् त्सन्ति प्र॒शिष॒स्तस्मि॑न्नि॒ष्टय॒ः स वाज॑स्य॒ शव॑सः शु॒ष्मिण॒स्पति॑ः ॥१॥

Tam prichchhata sa jagama sa veda sa chikitvam iyate sa nviyate
Tasmin tsanti prashishastasminnishtayah sa vajasya shavasah shushminaspatih

145.2

तमित् पृ॑च्छन्ति॒ न सि॒मो वि पृ॑च्छति॒ स्वेने॑व॒ धीरो॒ मन॑सा॒ यदग्र॑भीत् ।
न मृ॑ष्यते प्रथ॒मं नाप॑रं॒ वचो॒ ऽस्य क्रत्वा॑ सचते॒ अप्र॑दृपितः ॥२॥

Tamit prichchhanti na simo vi prichchhati sveneva dhiro manasa yadagrabhit
Na mrishyate prathamam naparam vacho sya kratva sachate apradripitah

145.3

तमिद् ग॑च्छन्ति जु॒ह्व १स्तमर्व॑ती॒र्विश्वा॒न्येक॑ः शृणव॒द् वचां॑सि मे ।
पु॒रु॒प्रै॒षस्ततु॑रिर्यज्ञ॒साध॒नो ऽच्छि॑द्रोति॒ः शिशु॒राद॑त्त॒ सं रभ॑ः ॥३॥

Tamid gachchhanti juhva 1stamarvatirvishvanyekah shrinavad vachansi me
Purupraishastaturiryagyasadhano chchhidrotih shishuradatta sam rabhah

145.4

उ॒प॒स्थायं॑ चरति॒ यत् स॒मार॑त स॒द्यो जा॒तस्त॑त्सार॒ युज्ये॑भिः ।
अ॒भि श्वा॒न्तं मृ॑शते ना॒न्द्ये॑ मु॒दे यदीं॒ गच्छ॑न्त्युश॒तीर॑पिष्ठि॒तम् ॥४॥

Upasthayam charati yat samarata sadyo jatastatsara yujyebhih
Abhi shvantam mrishate nandye mude yadim gachchhantyushatirapishthitam

145.5

स ईं॑ मृ॒गो अप्यो॑ वन॒र्गुरुप॑ त्व॒च्यु॑प॒मस्यां॒ नि धा॑यि ।
व्य॑ब्रवीद् व॒युना॒ मर्त्ये॑भ्यो॒ ऽग्निर्वि॒द्वाँ ऋ॑त॒चिद्धि स॒त्यः ॥५॥

Sa im mrigo apyo vanargurupa tvachyupamasyam ni dhayi
Vyabravid vayuna martyebhyo gnirvidvam ritachiddhi satyah