Sukta 146

146.1

5 dirghatama auchathyah, agnih, trishtup

त्रि॒मू॒र्धानं॑ स॒प्तर॑श्मिं गृणी॒षे ऽनू॑नम॒ग्निं पि॒त्रोरु॒पस्थे॑ ।
नि॒ष॒त्तम॑स्य॒ चर॑तो ध्रु॒वस्य॒ विश्वा॑ दि॒वो रो॑च॒नाप॑प्रि॒वांस॑म् ॥१॥

Trimurdhanam saptarashmim grinishe nunamagnim pitrorupasthe
Nishattamasya charato dhruvasya vishva divo rochanapaprivansam

146.2

उ॒क्षा म॒हाँ अ॒भि व॑वक्ष एने अ॒जर॑स्तस्थावि॒तऊ॑तिर्ऋ॒ष्वः ।
उ॒र्व्याः प॒दो नि द॑धाति॒ सानौ॑ रि॒हन्त्यूधो॑ अरु॒षासो॑ अस्य ॥२॥

Uksha maham abhi vavaksha ene ajarastasthavitautirrishvah
Urvyah pado ni dadhati sanau rihantyudho arushaso asya

146.3

स॒मा॒नं व॒त्सम॒भि सं॒चर॑न्ती॒ विष्व॑ग्धे॒नू वि च॑रतः सु॒मेके॑ ।
अ॒न॒प॒वृ॒ज्याँ अध्व॑नो॒ मिमा॑ने॒ विश्वा॒न् केताँ॒ अधि॑ म॒हो दधा॑ने ॥३॥

Samanam vatsamabhi sancharanti vishvagdhenu vi charatah sumeke
Anapavrijyam adhvano mimane vishvan ketam adhi maho dadhane

146.4

धीरा॑सः प॒दं क॒वयो॑ नयन्ति॒ नाना॑ हृ॒दा रक्ष॑माणा अजु॒र्यम् ।
सिषा॑सन्त॒ः पर्य॑पश्यन्त॒ सिन्धु॑मा॒विरे॑भ्यो अभव॒त् सूर्यो॒ नॄन् ॥४॥

Dhirasah padam kavayo nayanti nana hrida rakshamana ajuryam
Sishasantah paryapashyanta sindhumavirebhyo abhavat suryo nrin

146.5

दि॒दृ॒क्षेण्य॒ः परि॒ काष्ठा॑सु॒ जेन्य॑ ई॒ळेन्यो॑ म॒हो अर्भा॑य जी॒वसे॑ ।
पु॒रु॒त्रा यदभ॑व॒त् सूरहै॑भ्यो॒ गर्भे॑भ्यो म॒घवा॑ वि॒श्वद॑र्शतः ॥५॥

Didrikshenyah pari kashthasu jenya ilenyo maho arbhaya jivase
Purutra yadabhavat surahaibhyo garbhebhyo maghava vishvadarshatah