Sukta 147

147.1

5 dirghatama auchathyah, agnih, trishtup

क॒था ते॑ अग्ने शु॒चय॑न्त आ॒योर्द॑दा॒शुर्वाजे॑भिराशुषा॒णाः ।
उ॒भे यत् तो॒के तन॑ये॒ दधा॑ना ऋ॒तस्य॒ साम॑न् र॒णय॑न्त दे॒वाः ॥१॥

Katha te agne shuchayanta ayordadashurvajebhirashushanah
Ubhe yat toke tanaye dadhana ritasya saman ranayanta devah

बोधा॑ मे अ॒स्य वच॑सो यविष्ठ॒ मंहि॑ष्ठस्य॒ प्रभृ॑तस्य स्वधावः ।
पीय॑ति त्वो॒ अनु॑ त्वो गृणाति व॒न्दारु॑स्ते त॒न्वं॑ वन्दे अग्ने ॥२॥

Bodha me asya vachaso yavishtha manhishthasya prabhritasya svadhavah
Piyati tvo anu tvo grinati vandaruste tanvam vande agne

ये पा॒यवो॑ मामते॒यं ते॑ अग्ने॒ पश्य॑न्तो अ॒न्धं दु॑रि॒तादर॑क्षन् ।
र॒रक्ष॒ तान् त्सु॒कृतो॑ वि॒श्ववे॑दा॒ दिप्स॑न्त॒ इद् रि॒पवो॒ नाह॑ देभुः ॥३॥

Ye payavo mamateyam te agne pashyanto andham duritadarakshan
Raraksha tan tsukrito vishvaveda dipsanta id ripavo naha debhuh

यो नो॑ अग्ने॒ अर॑रिवाँ अघा॒युर॑राती॒वा म॒र्चय॑ति द्व॒येन॑ ।
मन्त्रो॑ गु॒रुः पुन॑रस्तु॒ सो अ॑स्मा॒ अनु॑ मृक्षीष्ट त॒न्वं॑ दुरु॒क्तैः ॥४॥

Yo no agne ararivam aghayurarativa marchayati dvayena
Mantro guruh punarastu so asma anu mrikshishta tanvam duruktaih

उ॒त वा॒ यः स॑हस्य प्रवि॒द्वान् मर्तो॒ मर्तं॑ म॒र्चय॑ति द्व॒येन॑ ।
अत॑ः पाहि स्तवमान स्तु॒वन्त॒मग्ने॒ माकि॑र्नो दुरि॒ताय॑ धायीः ॥५॥

Uta va yah sahasya pravidvan marto martam marchayati dvayena
Atah pahi stavamana stuvantamagne makirno duritaya dhayih