Sukta 148

148.1

5 dirghatama auchathyah, agnih, trishtup

मथी॒द् यदीं॑ वि॒ष्टो मा॑त॒रिश्वा॒ होता॑रं वि॒श्वाप्सुं॑ वि॒श्वदे॑व्यम् ।
नि यं द॒धुर्म॑नु॒ष्या॑सु वि॒क्षु स्व १ र्ण चि॒त्रं वपु॑षे वि॒भाव॑म् ॥१॥

Mathid yadim vishto matarishva hotaram vishvapsum vishvadevyam
Ni yam dadhurmanushyasu vikshu sva 1 rna chitram vapushe vibhavam

148.2

द॒दा॒नमिन्न द॑दभन्त॒ मन्मा॒ग्निर्वरू॑थं॒ मम॒ तस्य॑ चाकन् ।
जु॒षन्त॒ विश्वा॑न्यस्य॒ कर्मोप॑स्तुतिं॒ भर॑माणस्य का॒रोः ॥२॥

Dadanaminna dadabhanta manmagnirvarutham mama tasya chakan
Jushanta vishvanyasya karmopastutim bharamanasya karoh

148.3

नित्ये॑ चि॒न्नु यं सद॑ने जगृ॒भ्रे प्रश॑स्तिभिर्दधि॒रे य॒ज्ञिया॑सः ।
प्र सू न॑यन्त गृ॒भय॑न्त इ॒ष्टावश्वा॑सो॒ न र॒थ्यो॑ रारहा॒णाः ॥३॥

Nitye chinnu yam sadane jagribhre prashastibhirdadhire yagyiyasah
Pra su nayanta gribhayanta ishtavashvaso na rathyo rarahanah

148.4

पु॒रूणि॑ द॒स्मो नि रि॑णाति॒ जम्भै॒राद् रो॑चते॒ वन॒ आ वि॒भावा॑ ।
आद॑स्य॒ वातो॒ अनु॑ वाति शो॒चिरस्तु॒र्न शर्या॑मस॒नामनु॒ द्यून् ॥४॥

Puruni dasmo ni rinati jambhairad rochate vana a vibhava
Adasya vato anu vati shochirasturna sharyamasanamanu dyun

148.5

न यं रि॒पवो॒ न रि॑ष॒ण्यवो॒ गर्भे॒ सन्तं॑ रेष॒णा रे॒षय॑न्ति ।
अ॒न्धा अ॑प॒श्या न द॑भन्नभि॒ख्या नित्या॑स ईं प्रे॒तारो॑ अरक्षन् ॥५॥

Na yam ripavo na rishanyavo garbhe santam reshana reshayanti
Andha apashya na dabhannabhikhya nityasa im pretaro arakshan