সূক্ত 135

135.1

৯ পরুচ্ছেপো দৈবোদাসিঃ । ১-৩, ৯ বায়ুঃ, ৪-৮ ইন্দ্রবায়ূ। অত্যষ্টিঃ, ৭-৮ অষ্টিঃ।

স্তীর্ণং বর্হিরুপ নো যাহি বীতয়ে সহস্রেণ নিয়ুতা নিয়ুত্বতে শতিনীভির্নিয়ুত্বতে ।
তুভ্যং হি পূর্বপীতয়ে দেবা দেবায় যেমিরে ।
প্র তে সুতাসো মধুমন্তো অস্থিরন্ মদায় ক্রত্বে অস্থিরন্ ॥১॥

135.2

তুভ্যায়ং সোমঃ পরিপূতো অদ্রিভিঃ স্পার্হা বসানঃ পরি কোশমর্ষতি শুক্রা বসানো অর্ষতি ।
তবায়ং ভাগ আয়ুষু সোমো দেবেষু হূয়তে ।
বহ বায়ো নিয়ুতো যাহ্যস্ময়ুর্জুষাণো যাহ্যস্ময়ুঃ ॥২॥

135.3

আ নো নিয়ুদ্ভিঃ শতিনীভিরধ্বরং সহস্রিণীভিরুপ যাহি বীতয়ে বায়ো হব্যানি বীতয়ে ।
তবায়ং ভাগ ঋত্বিয়ঃ সরশ্মিঃ সূর্যে সচা ।
অধ্বর্যুভির্ভরমাণা অয়ংসত বায়ো শুক্রা অয়ংসত ॥৩॥

135.4

আ বাং রথো নিয়ুত্বান্ বক্ষদবসে ঽভি প্রয়াংসি সুধিতানি বীতয়ে বায়ো হব্যানি বীতয়ে ।
পিবতং মধ্বো অন্ধসঃ পূর্বপেয়ং হি বাং হিতম্ ।
বায়বা চন্দ্রেণ রাধসা গতমিন্দ্রশ্চ রাধসা গতম্ ॥৪॥

135.5

আ বাং ধিয়ো ববৃত্যুরধ্বরাঁ উপেমমিন্দুং মর্মৃজন্ত বাজিনমাশুমত্যং ন বাজিনম্ ।
তেষাং পিবতমস্ময়ূ আ নো গন্তমিহোত্যা ।
ইন্দ্রবায়ূ সুতানামদ্রিভির্যুবং মদায় বাজদা যুবম্ ॥৫॥

135.6

ইমে বাং সোমা অপ্স্বা সুতা ইহাধ্বর্যুভির্ভরমাণা অয়ংসত বায়ো শুক্রা অয়ংসত ।
এতে বামভ্যসৃক্ষত তিরঃ পবিত্রমাশবঃ ।
যুবায়বোঽতি রোমাণ্যব্যয়া সোমাসো অত্যব্যয়া ॥৬॥

135.7

অতি বায়ো সসতো যাহি শশ্বতো যত্র গ্রাবা বদতি তত্র গচ্ছতং গৃহমিন্দ্রশ্চ গচ্ছতম্ ।
বি সূনৃতা দদৃশে রীয়তে ঘৃতমা পূর্ণয়া নিয়ুতা যাথো অধ্বরমিন্দ্রশ্চ যাথো অধ্বরম্ ॥৭॥

135.8

অত্রাহ তদ্ বহেথে মধ্ব আহুতিং যমশ্বত্থমুপতিষ্ঠন্ত জায়বো ঽস্মে তে সন্তু জায়বঃ ।
সাকং গাবঃ সুবতে পচ্যতে যবো ন তে বায় উপ দস্যন্তি ধেনবো নাপ দস্যন্তি ধেনবঃ ॥৮॥

135.9

ইমে যে তে সু বায়ো বাহ্বোজসো ঽন্তর্নদী তে পতয়ন্ত্যুক্ষণো মহি ব্রাধন্ত উক্ষণঃ ।
ধন্বঞ্চিদ্ যে অনাশবো জীরাশ্চিদগিরৌকসঃ ।
সূর্যস্যেব রশ্ময়ো দুর্নিয়ন্তবো হস্তয়োর্দুর্নিয়ন্তবঃ ॥৯॥