Sukta 135

135.1

9 paruchchhepo daivodasih, 1-3, 9 vayuh, 4-8 indravayu, atyashtih, 7-8 ashtih

स्ती॒र्णं ब॒र्हिरुप॑ नो याहि वी॒तये॑ स॒हस्रे॑ण नि॒युता॑ नियुत्वते श॒तिनी॑भिर्नियुत्वते ।
तुभ्यं॒ हि पू॒र्वपी॑तये दे॒वा दे॒वाय॑ येमि॒रे ।
प्र ते॑ सु॒तासो॒ मधु॑मन्तो अस्थिर॒न् मदा॑य॒ क्रत्वे॑ अस्थिरन् ॥१॥

Stirnam barhirupa no yahi vitaye sahasrena niyuta niyutvate shatinibhirniyutvate
Tubhyam hi purvapitaye deva devaya yemire
Pra te sutaso madhumanto asthiran madaya kratve asthiran

135.2

तुभ्या॒यं सोम॒ः परि॑पूतो॒ अद्रि॑भिः स्पा॒र्हा वसा॑न॒ः परि॒ कोश॑मर्षति शु॒क्रा वसा॑नो अर्षति ।
तवा॒यं भा॒ग आ॒युषु॒ सोमो॑ दे॒वेषु॑ हूयते ।
वह॑ वायो नि॒युतो॑ याह्यस्म॒युर्जु॑षा॒णो या॑ह्यस्म॒युः ॥२॥

Tubhyayam somah pariputo adribhih sparha vasanah pari koshamarshati shukra vasano arshati
Tavayam bhaga ayushu somo deveshu huyate
Vaha vayo niyuto yahyasmayurjushano yahyasmayuh

135.3

आ नो॑ नि॒युद्भि॑ः श॒तिनी॑भिरध्व॒रं स॑ह॒स्रिणी॑भि॒रुप॑ याहि वी॒तये॒ वायो॑ ह॒व्यानि॑ वी॒तये॑ ।
तवा॒यं भा॒ग ऋ॒त्विय॒ः सर॑श्मि॒ः सूर्ये॒ सचा॑ ।
अ॒ध्व॒र्युभि॒र्भर॑माणा अयंसत॒ वायो॑ शु॒क्रा अ॑यंसत ॥३॥

A no niyudbhih shatinibhiradhvaram sahasrinibhirupa yahi vitaye vayo havyani vitaye
Tavayam bhaga ritviyah sarashmih surye sacha
Adhvaryubhirbharamana ayansata vayo shukra ayansata

135.4

आ वां॒ रथो॑ नि॒युत्वा॑न् वक्ष॒दव॑से॒ ऽभि प्रयां॑सि॒ सुधि॑तानि वी॒तये॒ वायो॑ ह॒व्यानि॑ वी॒तये॑ ।
पिब॑तं॒ मध्वो॒ अन्ध॑सः पूर्व॒पेयं॒ हि वां॑ हि॒तम् ।
वाय॒वा च॒न्द्रेण॒ राध॒सा ग॑त॒मिन्द्र॑श्च॒ राध॒सा ग॑तम् ॥४॥

A vam ratho niyutvan vakshadavase bhi prayansi sudhitani vitaye vayo havyani vitaye
Pibatam madhvo andhasah purvapeyam hi vam hitam
Vayava chandrena radhasa gatamindrashcha radhasa gatam

135.5

आ वां॒ धियो॑ ववृत्युरध्व॒राँ उपे॒ममिन्दुं॑ मर्मृजन्त वा॒जिन॑मा॒शुमत्यं॒ न वा॒जिन॑म् ।
तेषां॑ पिबतमस्म॒यू आ नो॑ गन्तमि॒होत्या ।
इन्द्र॑वायू सु॒ताना॒मद्रि॑भिर्यु॒वं मदा॑य वाजदा यु॒वम् ॥५॥

A vam dhiyo vavrityuradhvaram upemamindum marmrijanta vajinamashumatyam na vajinam
Tesham pibatamasmayu a no gantamihotya
Indravayu sutanamadribhiryuvam madaya vajada yuvam

135.6

इ॒मे वां॒ सोमा॑ अ॒प्स्वा सु॒ता इ॒हाध्व॒र्युभि॒र्भर॑माणा अयंसत॒ वायो॑ शु॒क्रा अ॑यंसत ।
ए॒ते वा॑म॒भ्य॑सृक्षत ति॒रः प॒वित्र॑मा॒शव॑ः ।
यु॒वा॒यवोऽति॒ रोमा॑ण्य॒व्यया॒ सोमा॑सो॒ अत्य॒व्यया॑ ॥६॥

Ime vam soma apsva suta ihadhvaryubhirbharamana ayansata vayo shukra ayansata
Ete vamabhyasrikshata tirah pavitramashavah
Yuvayavoti romanyavyaya somaso atyavyaya

135.7

अति॑ वायो सस॒तो या॑हि॒ शश्व॑तो॒ यत्र॒ ग्रावा॒ वद॑ति॒ तत्र॑ गच्छतं गृ॒हमिन्द्र॑श्च गच्छतम् ।
वि सू॒नृता॒ ददृ॑शे॒ रीय॑ते घृ॒तमा पू॒र्णया॑ नि॒युता॑ याथो अध्व॒रमिन्द्र॑श्च याथो अध्व॒रम् ॥७॥

Ati vayo sasato yahi shashvato yatra grava vadati tatra gachchhatam grihamindrashcha gachchhatam
Vi sunrita dadrishe riyate ghritama purnaya niyuta yatho adhvaramindrashcha yatho adhvaram

135.8

अत्राह॒ तद् व॑हेथे॒ मध्व॒ आहु॑तिं॒ यम॑श्व॒त्थमु॑प॒तिष्ठ॑न्त जा॒यवो॒ ऽस्मे ते स॑न्तु जा॒यव॑ः ।
सा॒कं गाव॒ः सुव॑ते॒ पच्य॑ते॒ यवो॒ न ते॑ वाय॒ उप॑ दस्यन्ति धे॒नवो॒ नाप॑ दस्यन्ति धे॒नव॑ः ॥८॥

Atraha tad vahethe madhva ahutim yamashvatthamupatishthanta jayavo sme te santu jayavah
Sakam gavah suvate pachyate yavo na te vaya upa dasyanti dhenavo napa dasyanti dhenavah

135.9

इ॒मे ये ते॒ सु वा॑यो बा॒ह्वो॑जसो॒ ऽन्तर्न॒दी ते॑ प॒तय॑न्त्यु॒क्षणो॒ महि॒ व्राध॑न्त उ॒क्षण॑ः ।
धन्व॑ञ्चि॒द् ये अ॑ना॒शवो॑ जी॒राश्चि॒दगि॑रौकसः ।
सूर्य॑स्येव र॒श्मयो॑ दुर्नि॒यन्त॑वो॒ हस्त॑योर्दुर्नि॒यन्त॑वः ॥९॥

Ime ye te su vayo bahvojaso ntarnadi te patayantyukshano mahi vradhanta ukshanah
Dhanvanchid ye anashavo jirashchidagiraukasah
Suryasyeva rashmayo durniyantavo hastayordurniyantavah