Sukta 134

134.1

6 paruchchhepo daivodasih, vayuh, atyashtih, 6 ashtih

आ त्वा॒ जुवो॑ रारहा॒णा अ॒भि प्रयो॒ वायो॒ वह॑न्त्वि॒ह पू॒र्वपी॑तये॒ सोम॑स्य पू॒र्वपी॑तये ।
ऊ॒र्ध्वा ते॒ अनु॑ सू॒नृता॒ मन॑स्तिष्ठतु जान॒ती ।
नि॒युत्व॑ता॒ रथे॒ना या॑हि दा॒वने॒ वायो॑ म॒खस्य॑ दा॒वने॑ ॥१॥

A tva juvo rarahana abhi prayo vayo vahantviha purvapitaye somasya purvapitaye
Urdhva te anu sunrita manastishthatu janati
Niyutvata rathena yahi davane vayo makhasya davane

134.2

मन्द॑न्तु त्वा म॒न्दिनो॑ वाय॒विन्द॑वो॒ ऽस्मत् क्रा॒णास॒ः सुकृ॑ता अ॒भिद्य॑वो॒ गोभि॑ः क्रा॒णा अ॒भिद्य॑वः ।
यद्ध॑ क्रा॒णा इ॒रध्यै॒ दक्षं॒ सच॑न्त ऊ॒तय॑ः ।
स॒ध्री॒ची॒ना नि॒युतो॑ दा॒वने॒ धिय॒ उप॑ ब्रुवत ईं॒ धिय॑ः ॥२॥

Mandantu tva mandino vayavindavo smat kranasah sukrita abhidyavo gobhih krana abhidyavah
Yaddha krana iradhyai daksham sachanta utayah
Sadhrichina niyuto davane dhiya upa bruvata im dhiyah

134.3

वा॒युर्यु॑ङ्क्ते॒ रोहि॑ता वा॒युर॑रु॒णा वा॒यू रथे॑ अजि॒रा धु॒रि वोह्ल॑वे॒ वहि॑ष्ठा धु॒रि वोह्ल॑वे ।
प्र बो॑धया॒ पुरं॑धिं जा॒र आ स॑स॒तीमि॑व ।
प्र च॑क्षय॒ रोद॑सी वासयो॒षस॒ः श्रव॑से वासयो॒षस॑ः ॥३॥

Vayuryunkte rohita vayuraruna vayu rathe ajira dhuri vohlave vahishtha dhuri vohlave
Pra bodhaya purandhim jara a sasatimiva
Pra chakshaya rodasi vasayoshasah shravase vasayoshasah

134.4

तुभ्य॑मु॒षास॒ः शुच॑यः परा॒वति॑ भ॒द्रा वस्त्रा॑ तन्वते॒ दंसु॑ र॒श्मिषु॑ चि॒त्रा नव्ये॑षु र॒श्मिषु॑ ।
तुभ्यं॑ धे॒नुः स॑ब॒र्दुघा॒ विश्वा॒ वसू॑नि दोहते ।
अज॑नयो म॒रुतो॑ व॒क्षणा॑भ्यो दि॒व आ व॒क्षणा॑भ्यः ॥४॥

Tubhyamushasah shuchayah paravati bhadra vastra tanvate dansu rashmishu chitra navyeshu rashmishu
Tubhyam dhenuh sabardugha vishva vasuni dohate
Ajanayo maruto vakshanabhyo diva a vakshanabhyah

134.5

तुभ्यं॑ शु॒क्रास॒ः शुच॑यस्तुर॒ण्यवो॒ मदे॑षू॒ग्रा इ॑षणन्त भु॒र्वण्य॒पामि॑षन्त भु॒र्वणि॑ ।
त्वां त्सा॒री दस॑मानो॒ भग॑मीट्टे तक्व॒वीये॑ ।
त्वं विश्व॑स्मा॒द् भुव॑नात् पासि॒ धर्म॑णासु॒र्या॑त् पासि॒ धर्म॑णा ॥५॥

Tubhyam shukrasah shuchayasturanyavo madeshugra ishananta bhurvanyapamishanta bhurvani
Tvam tsari dasamano bhagamitte takvaviye
Tvam vishvasmad bhuvanat pasi dharmanasuryat pasi dharmana

134.6

त्वं नो॑ वायवेषा॒मपू॑र्व्य॒ः सोमा॑नां प्रथ॒मः पी॒तिम॑र्हसि सु॒तानां॑ पी॒तिम॑र्हसि ।
उ॒तो वि॒हुत्म॑तीनां वि॒शां व॑व॒र्जुषी॑णाम् ।
विश्वा॒ इत् ते॑ धे॒नवो॑ दुह्र आ॒शिरं॑ घृ॒तं दु॑ह्रत आ॒शिर॑म् ॥६॥

Tvam no vayaveshamapurvyah somanam prathamah pitimarhasi sutanam pitimarhasi
Uto vihutmatinam visham vavarjushinam
Vishva it te dhenavo duhra ashiram ghritam duhrata ashiram