Sukta 133

133.1

7 paruchchhepo daivodasih, indrah, 1 trishtup, 2-4 anushtup, 5 gayatri, 6 dhritih, 7 ashtih

उ॒भे पु॑नामि॒ रोद॑सी ऋ॒तेन॒ द्रुहो॑ दहामि॒ सं म॒हीर॑नि॒न्द्राः ।
अ॒भि॒व्लग्य॒ यत्र॑ ह॒ता अ॒मित्रा॑ वैलस्था॒नं परि॑ तृ॒ह्ला अशे॑रन् ॥१॥

Ubhe punami rodasi ritena druho dahami sam mahiranindrah
Abhivlagya yatra hata amitra vailasthanam pari trihla asheran

133.2

अ॒भि॒व्लग्या॑ चिदद्रिवः शी॒र्षा या॑तु॒मती॑नाम् ।
छि॒न्धि व॑टू॒रिणा॑ प॒दा म॒हाव॑टूरिणा प॒दा ॥२॥

Abhivlagya chidadrivah shirsha yatumatinam
Chhindhi vaturina pada mahavaturina pada

133.3

अवा॑सां मघवञ्जहि॒ शर्धो॑ यातु॒मती॑नाम् ।
वै॒ल॒स्था॒न॒के अ॑र्म॒के म॒हावै॑लस्थे अर्म॒के ॥३॥

Avasam maghavanjahi shardho yatumatinam
Vailasthanake armake mahavailasthe armake

133.4

यासां॑ ति॒स्रः प॑ञ्चा॒शतो॑ ऽभिव्ल॒ङ्गैर॒पाव॑पः ।
तत् सु ते॑ मनायति त॒कत् सु ते॑ मनायति ॥४॥

Yasam tisrah panchashato bhivlangairapavapah
Tat su te manayati takat su te manayati

133.5

पि॒शङ्ग॑भृष्टिमम्भृ॒णं पि॒शाचि॑मिन्द्र॒ सं मृ॑ण ।
सर्वं॒ रक्षो॒ नि ब॑र्हय ॥५॥

Pishangabhrishtimambhrinam pishachimindra sam mrina
Sarvam raksho ni barhaya

133.6

अ॒वर्म॒ह इ॑न्द्र दादृ॒हि श्रु॒धी न॑ः शु॒शोच॒ हि द्यौः क्षा न भी॒षाँ अ॑द्रिवो घृ॒णान्न भी॒षाँ अ॑द्रिवः ।
शु॒ष्मिन्त॑मो॒ हि शु॒ष्मिभि॑र्व॒धैरु॒ग्रेभि॒रीय॑से ।
अपू॑रुषघ्नो अप्रतीत शूर॒ सत्व॑भिस्त्रिस॒प्तैः शू॑र॒ सत्व॑भिः ॥६॥

Avarmaha indra dadrihi shrudhi nah shushocha hi dyauh ksha na bhisham adrivo ghrinanna bhisham adrivah
Shushmintamo hi shushmibhirvadhairugrebhiriyase
Apurushaghno apratita shura satvabhistrisaptaih shura satvabhih

133.7

व॒नोति॒ हि सु॒न्वन् क्षयं॒ परी॑णसः सुन्वा॒नो हि ष्मा॒ यज॒त्यव॒ द्विषो॑ दे॒वाना॒मव॒ द्विष॑ः ।
सु॒न्वा॒न इत् सि॑षासति स॒हस्रा॑ वा॒ज्यवृ॑तः ।
सु॒न्वा॒नायेन्द्रो॑ ददात्या॒भुवं॑ र॒यिं द॑दात्या॒भुव॑म् ॥७॥

Vanoti hi sunvan kshayam parinasah sunvano hi shma yajatyava dvisho devanamava dvishah
Sunvana it sishasati sahasra vajyavritah
Sunvanayendro dadatyabhuvam rayim dadatyabhuvam