Sukta 132

132.1

6 paruchchhepo daivodasih, indrah, 6 (1ardharchasya) indraparvatau, atyashtih

त्वया॑ व॒यं म॑घव॒न् पूर्व्ये॒ धन॒ इन्द्र॑त्वोताः सासह्याम पृतन्य॒तो व॑नु॒याम॑ वनुष्य॒तः ।
नेदि॑ष्ठे अ॒स्मिन्नह॒न्यधि॑ वोचा॒ नु सु॑न्व॒ते ।
अ॒स्मिन् य॒ज्ञे वि च॑येमा॒ भरे॑ कृ॒तं वा॑ज॒यन्तो॒ भरे॑ कृ॒तम् ॥१॥

Tvaya vayam maghavan purvye dhana indratvotah sasahyama pritanyato vanuyama vanushyatah
Nedishthe asminnahanyadhi vocha nu sunvate
Asmin yagye vi chayema bhare kritam vajayanto bhare kritam

132.2

स्व॒र्जे॒षे भर॑ आ॒प्रस्य॒ वक्म॑न्युष॒र्बुध॒ः स्वस्मि॒न्नञ्ज॑सि क्रा॒णस्य॒ स्वस्मि॒न्नञ्ज॑सि ।
अह॒न्निन्द्रो॒ यथा॑ वि॒दे शी॒र्ष्णाशी॑र्ष्णोप॒वाच्य॑ः ।
अ॒स्म॒त्रा ते॑ स॒ध्र्य॑क् सन्तु रा॒तयो॑ भ॒द्रा भ॒द्रस्य॑ रा॒तय॑ः ॥२॥

Svarjeshe bhara aprasya vakmanyusharbudhah svasminnanjasi kranasya svasminnanjasi
Ahannindro yatha vide shirshnashirshnopavachyah
Asmatra te sadhryak santu ratayo bhadra bhadrasya ratayah

132.3

तत् तु प्रय॑ः प्र॒त्नथा॑ ते शुशुक्व॒नं यस्मि॑न् य॒ज्ञे वार॒मकृ॑ण्वत॒ क्षय॑मृ॒तस्य॒ वार॑सि॒ क्षय॑म् ।
वि तद् वो॑चे॒रध॑ द्वि॒ताऽन्तः प॑श्यन्ति र॒श्मिभि॑ः ।
स घा॑ विदे॒ अन्विन्द्रो॑ ग॒वेष॑णो बन्धु॒क्षिद्भ्यो॑ ग॒वेष॑णः ॥३॥

Tat tu prayah pratnatha te shushukvanam yasmin yagye varamakrinvata kshayamritasya varasi kshayam
Vi tad vocheradha dvitantah pashyanti rashmibhih
Sa gha vide anvindro gaveshano bandhukshidbhyo gaveshanah

132.4

नू इ॒त्था ते॑ पू॒र्वथा॑ च प्र॒वाच्यं॒ यदङ्गि॑रो॒भ्योऽवृ॑णो॒रप॑ व्र॒जमिन्द्र॒ शिक्ष॒न्नप॑ व्र॒जम् ।
ऐभ्य॑ः समा॒न्या दि॒शा ऽस्मभ्यं॑ जेषि॒ योत्सि॑ च ।
सु॒न्वद्भ्यो॑ रन्धया॒ कं चि॑दव्र॒तं हृ॑णा॒यन्तं॑ चिदव्र॒तम् ॥४॥

Nu ittha te purvatha cha pravachyam yadangirobhyovrinorapa vrajamindra shikshannapa vrajam
Aibhyah samanya disha smabhyam jeshi yotsi cha
Sunvadbhyo randhaya kam chidavratam hrinayantam chidavratam

132.5

सं यज्जना॒न् क्रतु॑भि॒ः शूर॑ ई॒क्षय॒द्धने॑ हि॒ते त॑रुषन्त श्रव॒स्यव॒ः प्र य॑क्षन्त श्रव॒स्यव॑ः ।
तस्मा॒ आयु॑ः प्र॒जाव॒दिद् बाधे॑ अर्च॒न्त्योज॑सा ।
इन्द्र॑ ओ॒क्यं॑ दिधिषन्त धी॒तयो॑ दे॒वाँ अच्छा॒ न धी॒तय॑ः ॥५॥

Sam yajjanan kratubhih shura ikshayaddhane hite tarushanta shravasyavah pra yakshanta shravasyavah
Tasma ayuh prajavadid badhe archantyojasa
Indra okyam didhishanta dhitayo devam achchha na dhitayah

132.6

यु॒वं तमि॑न्द्रापर्वता पुरो॒युधा॒ यो न॑ः पृत॒न्यादप॒ तंत॒मिद्ध॑तं॒ वज्रे॑ण॒ तंत॒मिद्ध॑तम् ।
दू॒रे च॒त्ताय॑ च्छन्त्स॒द् गह॑नं॒ यदिन॑क्षत् ।
अ॒स्माकं॒ शत्रू॒न् परि॑ शूर वि॒श्वतो॑ द॒र्मा द॑र्षीष्ट वि॒श्वत॑ः ॥६॥

Yuvam tamindraparvata puroyudha yo nah pritanyadapa tantamiddhatam vajrena tantamiddhatam
Dure chattaya chchhantsad gahanam yadinakshat
Asmakam shatrun pari shura vishvato darma darshishta vishvatah