সূক্ত 134

134.1

৬ পরুচ্ছেপো দৈবোদাসিঃ । বায়ুঃ। অত্যষ্টিঃ, ৬ অষ্টিঃ।

আ ত্বা জুবো রারহাণা অভি প্রয়ো বায়ো বহন্ত্বিহ পূর্বপীতয়ে সোমস্য পূর্বপীতয়ে ।
ঊর্ধ্বা তে অনু সূনৃতা মনস্তিষ্ঠতু জানতী ।
নিয়ুত্বতা রথেনা যাহি দাবনে বায়ো মখস্য দাবনে ॥১॥

134.2

মন্দন্তু ত্বা মন্দিনো বায়বিন্দবো ঽস্মৎ ক্রাণাসঃ সুকৃতা অভিদ্যবো গোভিঃ ক্রাণা অভিদ্যবঃ ।
যদ্ধ ক্রাণা ইরধ্যৈ দক্ষং সচন্ত ঊতয়ঃ ।
সধ্রীচীনা নিয়ুতো দাবনে ধিয় উপ ব্রুবত ঈং ধিয়ঃ ॥২॥

134.3

বায়ুর্যুঙ্ক্তে রোহিতা বায়ুররুণা বায়ূ রথে অজিরা ধুরি বোহ্লবে বহিষ্ঠা ধুরি বোহ্লবে ।
প্র বোধয়া পুরংধিং জার আ সসতীমিব ।
প্র চক্ষয় রোদসী বাসয়োষসঃ শ্রবসে বাসয়োষসঃ ॥৩॥

134.4

তুভ্যমুষাসঃ শুচয়ঃ পরাবতি ভদ্রা বস্ত্রা তন্বতে দংসু রশ্মিষু চিত্রা নব্যেষু রশ্মিষু ।
তুভ্যং ধেনুঃ সবর্দুঘা বিশ্বা বসূনি দোহতে ।
অজনয়ো মরুতো বক্ষণাভ্যো দিব আ বক্ষণাভ্যঃ ॥৪॥

134.5

তুভ্যং শুক্রাসঃ শুচয়স্তুরণ্যবো মদেষূগ্রা ইষণন্ত ভুর্বণ্যপামিষন্ত ভুর্বণি ।
ত্বাং ত্সারী দসমানো ভগমীট্টে তক্ববীয়ে ।
ত্বং বিশ্বস্মাদ্ ভুবনাৎ পাসি ধর্মণাসুর্যাৎ পাসি ধর্মণা ॥৫॥

134.6

ত্বং নো বায়বেষামপূর্ব্যঃ সোমানাং প্রথমঃ পীতিমর্হসি সুতানাং পীতিমর্হসি ।
উতো বিহুত্মতীনাং বিশাং ববর্জুষীণাম্ ।
বিশ্বা ইৎ তে ধেনবো দুহ্র আশিরং ঘৃতং দুহ্রত আশিরম্ ॥৬॥