সূক্ত 128

128.1

৮ পরুচ্ছেপো দৈবোদাসিঃ । অগ্নিঃ। অত্যষ্টিঃ।

অয়ং জায়ত মনুষো ধরীমণি হোতা যজিষ্ঠ উশিজামনু ব্রতমগ্নিঃ স্বমনু ব্রতম্ ।
বিশ্বশ্রুষ্টিঃ সখীয়তে রয়িরিব শ্রবস্যতে ।
অদব্ধো হোতা নি ষদদিলস্পদে পরিবীত ইলস্পদে ॥১॥

128.2

তং যজ্ঞসাধমপি বাতয়ামস্যৃতস্য পথা নমসা হবিষ্মতা দেবতাতা হবিষ্মতা ।
স ন ঊর্জামুপাভৃত্যয়া কৃপা ন জূর্যতি ।
যং মাতরিশ্বা মনবে পরাবতো দেবং ভাঃ পরাবতঃ ॥২॥

128.3

এবেন সদ্যঃ পর্যেতি পার্থিবং মুহুর্গী রেতো বৃষভঃ কনিক্রদদ্ দধদ্ রেতঃ কনিক্রদৎ ।
শতং চক্ষাণো অক্ষভির্দেবো বনেষু তুর্বণিঃ ।
সদো দধান উপরেষু সানুষ্বগ্নিঃ পরেষু সানুষু ॥৩॥

128.4

স সুক্রতুঃ পুরোহিতো দমেদমে ঽগ্নির্যজ্ঞস্যাধ্বরস্য চেততি ক্রত্বা যজ্ঞস্য চেততি ।
ক্রত্বা বেধা ইষূয়তে বিশ্বা জাতানি পস্পশে ।
যতো ঘৃতশ্রীরতিথিরজায়ত বহ্নির্বেধা অজায়ত ॥৪॥

128.5

ক্রত্বা যদস্য তবিষীষু পৃঞ্চতে ঽগ্নেরবেণ মরুতাং ন ভোজ্যেষিরায় ন ভোজ্যা ।
স হি ষ্মা দানমিন্বতি বসূনাং চ মজ্মনা ।
স নস্ত্রাসতে দুরিতাদভিহ্রুতঃ শংসাদঘাদভিহ্রুতঃ ॥৫॥

128.6

বিশ্বো বিহায়া অরতির্বসুর্দধে হস্তে দক্ষিণে তরণির্ন শিশ্রথচ্ছ্রবস্যয়া ন শিশ্রথৎ ।
বিশ্বস্মা ইদিষুধ্যতে দেবত্রা হব্যমোহিষে ।
বিশ্বস্মা ইৎ সুকৃতে বারমৃণ্বত্যগ্নির্দ্বারা ব্যৃণ্বতি ॥৬॥

128.7

স মানুষে বৃজনে শংতমো হিতো ৩ ঽগ্নির্যজ্ঞেষু জেন্যো ন বিশ্পতিঃ প্রিয়ো যজ্ঞেষু বিশ্পতিঃ ।
স হব্যা মানুষাণামিলা কৃতানি পত্যতে ।
স নস্ত্রাসতে বরুণস্য ধূর্তের্মহো দেবস্য ধূর্তেঃ ॥৭॥

128.8

অগ্নিং হোতারমীলতে বসুধিতিং প্রিয়ং চেতিষ্ঠমরতিং ন্যেরিরে হব্যবাহং ন্যেরিরে ।
বিশ্বায়ুং বিশ্ববেদসং হোতারং যজতং কবিম্ ।
দেবাসো রণ্বমবসে বসূয়বো গীর্ভী রণ্বং বসূয়বঃ ॥৮॥