Sukta 128

128.1

8 paruchchhepo daivodasih, agnih, atyashtih

अ॒यं जा॑यत॒ मनु॑षो॒ धरी॑मणि॒ होता॒ यजि॑ष्ठ उ॒शिजा॒मनु॑ व्र॒तम॒ग्निः स्वमनु॑ व्र॒तम् ।
वि॒श्वश्रु॑ष्टिः सखीय॒ते र॒यिरि॑व श्रवस्य॒ते ।
अद॑ब्धो॒ होता॒ नि ष॑ददि॒ळस्प॒दे परि॑वीत इ॒ळस्प॒दे ॥१॥

Ayam jayata manusho dharimani hota yajishtha ushijamanu vratamagnih svamanu vratam
Vishvashrushtih sakhiyate rayiriva shravasyate
Adabdho hota ni shadadilaspade parivita ilaspade

128.2

तं य॑ज्ञ॒साध॒मपि॑ वातयामस्यृ॒तस्य॑ प॒था नम॑सा ह॒विष्म॑ता दे॒वता॑ता ह॒विष्म॑ता ।
स न॑ ऊ॒र्जामु॒पाभृ॑त्य॒या कृ॒पा न जू॑र्यति ।
यं मा॑त॒रिश्वा॒ मन॑वे परा॒वतो॑ दे॒वं भाः प॑रा॒वत॑ः ॥२॥

Tam yagyasadhamapi vatayamasyritasya patha namasa havishmata devatata havishmata
Sa na urjamupabhrityaya kripa na juryati
Yam matarishva manave paravato devam bhah paravatah

128.3

एवे॑न स॒द्यः पर्ये॑ति॒ पार्थि॑वं मुहु॒र्गी रेतो॑ वृष॒भः कनि॑क्रद॒द् दध॒द् रेत॒ः कनि॑क्रदत् ।
श॒तं चक्षा॑णो अ॒क्षभि॑र्दे॒वो वने॑षु तु॒र्वणि॑ः ।
सदो॒ दधा॑न॒ उप॑रेषु॒ सानु॑ष्व॒ग्निः परे॑षु॒ सानु॑षु ॥३॥

Evena sadyah paryeti parthivam muhurgi reto vrishabhah kanikradad dadhad retah kanikradat
Shatam chakshano akshabhirdevo vaneshu turvanih
Sado dadhana upareshu sanushvagnih pareshu sanushu

128.4

स सु॒क्रतु॑ः पु॒रोहि॑तो॒ दमे॑दमे॒ ऽग्निर्य॒ज्ञस्या॑ध्व॒रस्य॑ चेतति॒ क्रत्वा॑ य॒ज्ञस्य॑ चेतति ।
क्रत्वा॑ वे॒धा इ॑षूय॒ते विश्वा॑ जा॒तानि॑ पस्पशे ।
यतो॑ घृत॒श्रीरति॑थि॒रजा॑यत॒ वह्नि॑र्वे॒धा अजा॑यत ॥४॥

Sa sukratuh purohito damedame gniryagyasyadhvarasya chetati kratva yagyasya chetati
Kratva vedha ishuyate vishva jatani paspashe
Yato ghritashriratithirajayata vahnirvedha ajayata

128.5

क्रत्वा॒ यद॑स्य॒ तवि॑षीषु पृ॒ञ्चते॒ ऽग्नेरवे॑ण म॒रुतां॒ न भो॒ज्ये॑षि॒राय॒ न भो॒ज्या॑ ।
स हि ष्मा॒ दान॒मिन्व॑ति॒ वसू॑नां च म॒ज्मना॑ ।
स न॑स्त्रासते दुरि॒ताद॑भि॒ह्रुत॒ः शंसा॑द॒घाद॑भि॒ह्रुत॑ः ॥५॥

Kratva yadasya tavishishu princhate gneravena marutam na bhojyeshiraya na bhojya
Sa hi shma danaminvati vasunam cha majmana
Sa nastrasate duritadabhihrutah shansadaghadabhihrutah

128.6

विश्वो॒ विहा॑या अर॒तिर्वसु॑र्दधे॒ हस्ते॒ दक्षि॑णे त॒रणि॒र्न शि॑श्रथच्छ्रव॒स्यया॒ न शि॑श्रथत् ।
विश्व॑स्मा॒ इदि॑षुध्य॒ते दे॑व॒त्रा ह॒व्यमोहि॑षे ।
विश्व॑स्मा॒ इत् सु॒कृते॒ वार॑मृण्वत्य॒ग्निर्द्वारा॒ व्यृ॑ण्वति ॥६॥

Vishvo vihaya aratirvasurdadhe haste dakshine taranirna shishrathachchhravasyaya na shishrathat
Vishvasma idishudhyate devatra havyamohishe
Vishvasma it sukrite varamrinvatyagnirdvara vyrinvati

128.7

स मानु॑षे वृ॒जने॒ शंत॑मो हि॒तो॒ ३ ऽग्निर्य॒ज्ञेषु॒ जेन्यो॒ न वि॒श्पति॑ः प्रि॒यो य॒ज्ञेषु॑ वि॒श्पति॑ः ।
स ह॒व्या मानु॑षाणामि॒ळा कृ॒तानि॑ पत्यते ।
स न॑स्त्रासते॒ वरु॑णस्य धू॒र्तेर्म॒हो दे॒वस्य॑ धू॒र्तेः ॥७॥

Sa manushe vrijane shantamo hito 3 gniryagyeshu jenyo na vishpatih priyo yagyeshu vishpatih
Sa havya manushanamila kritani patyate
Sa nastrasate varunasya dhurtermaho devasya dhurteh

128.8

अ॒ग्निं होता॑रमीळते॒ वसु॑धितिं प्रि॒यं चेति॑ष्ठमर॒तिं न्ये॑रिरे हव्य॒वाहं॒ न्ये॑रिरे ।
वि॒श्वायुं॑ वि॒श्ववे॑दसं॒ होता॑रं यज॒तं क॒विम् ।
दे॒वासो॑ र॒ण्वमव॑से वसू॒यवो॑ गी॒र्भी र॒ण्वं व॑सू॒यव॑ः ॥८॥

Agnim hotaramilate vasudhitim priyam chetishthamaratim nyerire havyavaham nyerire
Vishvayum vishvavedasam hotaram yajatam kavim
Devaso ranvamavase vasuyavo girbhi ranvam vasuyavah