Sukta 129

129.1

11 paruchchhepo daivodasih, indrah, induh, atyashtih, 8-9 atishakvaryau, 11ashtih

यं त्वं रथ॑मिन्द्र मे॒धसा॑तये ऽपा॒का सन्त॑मिषिर प्र॒णय॑सि॒ प्रान॑वद्य॒ नय॑सि ।
स॒द्यश्चि॒त्तम॒भिष्ट॑ये॒ करो॒ वश॑श्च वा॒जिन॑म् ।
सास्माक॑मनवद्य तूतुजान वे॒धसा॑मि॒मां वाचं॒ न वे॒धसा॑म् ॥१॥

Yam tvam rathamindra medhasataye paka santamishira pranayasi pranavadya nayasi
Sadyashchittamabhishtaye karo vashashcha vajinam
Sasmakamanavadya tutujana vedhasamimam vacham na vedhasam

129.2

स श्रु॑धि॒ यः स्मा॒ पृत॑नासु॒ कासु॑ चिद् द॒क्षाय्य॑ इन्द्र॒ भर॑हूतये॒ नृभि॒रसि॒ प्रतू॑र्तये॒ नृभि॑ः ।
यः शूरै॒ः स्व १ः सनि॑ता॒ यो विप्रै॒र्वाजं॒ तरु॑ता ।
तमी॑शा॒नास॑ इरधन्त वा॒जिनं॑ पृ॒क्षमत्यं॒ न वा॒जिन॑म् ॥२॥

Sa shrudhi yah sma pritanasu kasu chid dakshayya indra bharahutaye nribhirasi praturtaye nribhih
Yah shuraih sva 1h sanita yo viprairvajam taruta
Tamishanasa iradhanta vajinam prikshamatyam na vajinam

129.3

द॒स्मो हि ष्मा॒ वृष॑णं॒ पिन्व॑सि॒ त्वचं॒ कं चि॑द् यावीर॒ररुं॑ शूर॒ मर्त्यं॑ परिवृ॒णक्षि॒ मर्त्य॑म् ।
इन्द्रो॒त तुभ्यं॒ तद् दि॒वे तद् रु॒द्राय॒ स्वय॑शसे ।
मि॒त्राय॑ वोचं॒ वरु॑णाय स॒प्रथ॑ः सुमृळी॒काय॑ स॒प्रथ॑ः ॥३॥

Dasmo hi shma vrishanam pinvasi tvacham kam chid yavirararum shura martyam parivrinakshi martyam
Indrota tubhyam tad dive tad rudraya svayashase
Mitraya vocham varunaya saprathah sumrilikaya saprathah

129.4

अ॒स्माकं॑ व॒ इन्द्र॑मुश्मसी॒ष्टये॒ सखा॑यं वि॒श्वायुं॑ प्रा॒सहं॒ युजं॒ वाजे॑षु प्रा॒सहं॒ युज॑म् ।
अ॒स्माकं॒ ब्रह्मो॒तये ऽवा॑ पृ॒त्सुषु॒ कासु॑ चित् ।
न॒हि त्वा॒ शत्रु॒ः स्तर॑तेः स्तृ॒णोषि॒ यं विश्वं॒ शत्रुं॑ः स्तृ॒णोषि॒ यम् ॥४॥

Asmakam va indramushmasishtaye sakhayam vishvayum prasaham yujam vajeshu prasaham yujam
Asmakam brahmotaye va pritsushu kasu chit
Nahi tva shatruh starateh strinoshi yam vishvam shatrunh strinoshi yam

129.5

नि षू न॒माति॑मतिं॒ कय॑स्य चि॒त् तेजि॑ष्ठाभिर॒रणि॑भि॒र्नोतिभि॑रु॒ग्राभि॑रुग्रो॒तिभि॑ः ।
नेषि॑ णो॒ यथा॑ पु॒राऽने॒नाः शू॑र॒ मन्य॑से ।
विश्वा॑नि पू॒रोरप॑ पर्षि॒ वह्नि॑रा॒सा वह्नि॑र्नो॒ अच्छ॑ ॥५॥

Ni shu namatimatim kayasya chit tejishthabhiraranibhirnotibhirugrabhirugrotibhih
Neshi no yatha puranenah shura manyase
Vishvani purorapa parshi vahnirasa vahnirno achchha

129.6

प्र तद् वो॑चेयं॒ भव्या॒येन्द॑वे॒ हव्यो॒ न य इ॒षवा॒न् मन्म॒ रेज॑ति रक्षो॒हा मन्म॒ रेज॑ति ।
स्व॒यं सो अ॒स्मदा नि॒दो व॒धैर॑जेत दुर्म॒तिम् ।
अव॑ स्रवेद॒घशं॑सोऽवत॒रमव॑ क्षु॒द्रमि॑व स्रवेत् ॥६॥

Pra tad vocheyam bhavyayendave havyo na ya ishavan manma rejati rakshoha manma rejati
Svayam so asmada nido vadhairajeta durmatim
Ava sravedaghashansovataramava kshudramiva sravet

129.7

व॒नेम॒ तद्धोत्र॑या चि॒तन्त्या॑ व॒नेम॑ र॒यिं र॑यिवः सु॒वीर्यं॑ र॒ण्वं सन्तं॑ सु॒वीर्य॑म् ।
दु॒र्मन्मा॑नं सु॒मन्तु॑भि॒रेमि॒षा पृ॑चीमहि ।
आ स॒त्याभि॒रिन्द्रं॑ द्यु॒म्नहू॑तिभि॒र्यज॑त्रं द्यु॒म्नहू॑तिभिः ॥७॥

Vanema taddhotraya chitantya vanema rayim rayivah suviryam ranvam santam suviryam
Durmanmanam sumantubhiremisha prichimahi
A satyabhirindram dyumnahutibhiryajatram dyumnahutibhih

129.8

प्रप्रा॑ वो अ॒स्मे स्वय॑शोभिरू॒ती प॑रिव॒र्ग इन्द्रो॑ दुर्मती॒नां दरी॑मन् दुर्मती॒नाम् ।
स्व॒यं सा रि॑ष॒यध्यै॒ या न॑ उपे॒षे अ॒त्रैः ।
ह॒तेम॑स॒न्न व॑क्षति क्षि॒प्ता जू॒र्णिर्न व॑क्षति ॥८॥

Prapra vo asme svayashobhiruti parivarga indro durmatinam dariman durmatinam
Svayam sa rishayadhyai ya na upeshe atraih
Hatemasanna vakshati kshipta jurnirna vakshati

129.9

त्वं न॑ इन्द्र रा॒या परी॑णसा या॒हि प॒थाँ अ॑ने॒हसा॑ पु॒रो या॑ह्यर॒क्षसा॑ ।
सच॑स्व नः परा॒क आ सच॑स्वास्तमी॒क आ ।
पा॒हि नो॑ दू॒रादा॒राद॒भिष्टि॑भि॒ः सदा॑ पाह्य॒भिष्टि॑भिः ॥९॥

Tvam na indra raya parinasa yahi patham anehasa puro yahyarakshasa
Sachasva nah paraka a sachasvastamika a
Pahi no duradaradabhishtibhih sada pahyabhishtibhih

129.10

त्वं न॑ इन्द्र रा॒या तरू॑षसो॒ग्रं चि॑त् त्वा महि॒मा स॑क्ष॒दव॑से म॒हे मि॒त्रं नाव॑से ।
ओजि॑ष्ठ॒ त्रात॒रवि॑ता॒ रथं॒ कं चि॑दमर्त्य ।
अ॒न्यम॒स्मद् रि॑रिषे॒ः कं चि॑दद्रिवो॒ रिरि॑क्षन्तं चिदद्रिवः ॥१०॥

Tvam na indra raya tarushasogram chit tva mahima sakshadavase mahe mitram navase
Ojishtha trataravita ratham kam chidamartya
Anyamasmad ririsheh kam chidadrivo ririkshantam chidadrivah

129.11

पा॒हि न॑ इन्द्र सुष्टुत स्रि॒धो॑ ऽवया॒ता सद॒मिद् दु॑र्मती॒नां दे॒वः सन्दु॑र्मती॒नाम् ।
ह॒न्ता पा॒पस्य॑ र॒क्षस॑स्त्रा॒ता विप्र॑स्य॒ माव॑तः ।
अधा॒ हि त्वा॑ जनि॒ता जीज॑नद् वसो रक्षो॒हणं॑ त्वा॒ जीज॑नद् वसो ॥११॥

Pahi na indra sushtuta sridho vayata sadamid durmatinam devah sandurmatinam
Hanta papasya rakshasastrata viprasya mavatah
Adha hi tva janita jijanad vaso rakshohanam tva jijanad vaso