সূক্ত 127

127.1

১১ পরুচ্ছেপো দৈবোদাসিঃ । অগ্নিঃ। অত্যষ্টিঃ, ৬ অতিধৃতিঃ।

অগ্নিং হোতারং মন্যে দাস্বন্তং বসুং সূনুং সহসো জাতবেদসং বিপ্রং ন জাতবেদসম্ ।
য ঊর্ধ্বয়া স্বধ্বরো দেবো দেবাচ্যা কৃপা ।
ঘৃতস্য বিভ্রাষ্টিমনু বষ্টি শোচিষা ঽঽজুহ্বানস্য সর্পিষঃ ॥১॥

127.2

যজিষ্ঠং ত্বা যজমানা হুবেম জ্যেষ্ঠমঙ্গিরসাং বিপ্র মন্মভির্বিপ্রেভিঃ শুক্র মন্মভিঃ ।
পরিজ্মানমিব দ্যাং হোতারং চর্ষণীনাম্ ।
শোচিষ্কেশং বৃষণং যমিমা বিশঃ প্রাবন্তু জূতয়ে বিশঃ ॥২॥

127.3

স হি পুরূ চিদোজসা বিরুক্মতা দীদ্যানো ভবতি দ্রুহংতরঃ পরশুর্ন দ্রুহংতরঃ ।
বীলু চিদ্ যস্য সমৃতৌ শ্রুবদ্ বনেব যৎ স্থিরম্ ।
নিষ্ষহমাণো যমতে নায়তে ধন্বাসহা নায়তে ॥৩॥

127.4

দৃহ্লা চিদস্মা অনু দুর্যথা বিদে তেজিষ্ঠাভিররণিভির্দাষ্ট্যবসে ঽগ্নয়ে দাষ্ট্যবসে ।
প্র যঃ পুরূণি গাহতে তক্ষদ্ বনেব শোচিষা ।
স্থিরা চিদন্না নি রিণাত্যোজসা নি স্থিরাণি চিদোজসা ॥৪॥

127.5

তমস্য পৃক্ষমুপরাসু ধীমহি নক্তং যঃ সুদর্শতরো দিবাতরাদপ্রায়ুষে দিবাতরাৎ ।
আদস্যায়ুর্গ্রভণবদ্ বীলু শর্ম ন সূনবে ।
ভক্তমভক্তমবো ব্যন্তো অজরা অগ্নয়ো ব্যন্তো অজরাঃ ॥৫॥

127.6

স হি শর্ধো ন মারুতং তুবিষ্বণিরপ্নস্বতীষূর্বরাস্বিষ্টনিরার্তনাস্বিষ্টনিঃ ।
আদদ্ধব্যান্যাদদির্যজ্ঞস্য কেতুরর্হণা ।
অধ স্মাস্য হর্ষতো হৃষীবতো বিশ্বে জুষন্ত পন্থাং নরঃ শুভে ন পন্থাম্ ॥৬॥

127.7

দ্বিতা যদীং কীস্তাসো অভিদ্যবো নমস্যন্ত উপবোচন্ত ভৃগবো মথ্নন্তো দাশা ভৃগবঃ ।
অগ্নিরীশে বসূনাং শুচির্যো ধর্ণিরেষাম্ ।
প্রিয়াঁ অপিধীঁর্বনিষীষ্ট মেধির আ বনিষীষ্ট মেধিরঃ ॥৭॥

127.8

বিশ্বাসাং ত্বা বিশাং পতিং হবামহে সর্বাসাং সমানং দম্পতিং ভুজে সত্যগির্বাহসং ভুজে ।
অতিথিং মানুষাণাং পিতুর্ন যস্যাসয়া ।
অমী চ বিশ্বে অমৃতাস আ বয়ো হব্যা দেবেষ্বা বয়ঃ ॥৮॥

127.9

ত্বমগ্নে সহসা সহন্তমঃ শুষ্মিন্তমো জায়সে দেবতাতয়ে রয়ির্ন দেবতাতয়ে ।
শুষ্মিন্তমো হি তে মদো দ্যুম্নিন্তম উত ক্রতুঃ ।
অধ স্মা তে পরি চরন্ত্যজর শ্রুষ্টীবানো নাজর ॥৯॥

127.10

প্র বো মহে সহসা সহস্বত উষর্বুধে পশুষে নাগ্নয়ে স্তোমো বভূত্বগ্নয়ে ।
প্রতি যদীং হবিষ্মান্ বিশ্বাসু ক্ষাসু জোগুবে ।
অগ্রে রেভো ন জরত ঋষূণাং জূর্ণির্হোত ঋষূণাম্ ॥১০॥

127.11

স নো নেদিষ্ঠং দদৃশান আ ভরাগ্নে দেবেভিঃ সচনাঃ সুচেতুনা মহো রায়ঃ সুচেতুনা ।
মহি শবিষ্ঠ নস্কৃধি সংচক্ষে ভুজে অস্যৈ ।
মহি স্তোতৃভ্যো মঘবন্ ত্সুবীর্যং মথীরুগ্রো ন শবসা ॥১১॥