সূক্ত 122

122.1

১৫ কক্ষীবান্ দৈর্ঘতমস ঔশিজঃ। বিশ্বে দেবাঃ । ত্রিষ্টুপ্,- ৫-৬ বিরাড্ রূপা।

প্র বঃ পান্তং রঘুমন্যবোঽন্ধো যজ্ঞং রুদ্রায় মীহ্লুষে ভরধ্বম্ ।
দিবো অস্তোষ্যসুরস্য বীরৈরিষুধ্যেব মরুতো রোদস্যোঃ ॥১॥

পত্নীব পূর্বহূতিং বাবৃধধ্যা উষাসানক্তা পুরুধা বিদানে ।
স্তরীর্নাত্কং ব্যুতং বসানা সূর্যস্য শ্রিয়া সুদৃশী হিরণ্যৈঃ ॥২॥

মমত্তু নঃ পরিজ্মা বসর্হা মমত্তু বাতো অপাং বৃষণ্বান্ ।
শিশীতমিন্দ্রাপর্বতা যুবং নস্তন্নো বিশ্বে বরিবস্যন্তু দেবাঃ ॥৩॥

উত ত্যা মে যশসা শ্বেতনায়ৈ ব্যন্তা পান্তৌশিজো হুবধ্যৈ ।
প্র বো নপাতমপাং কৃণুধ্বং প্র মাতরা রাস্পিনস্যায়োঃ ॥৪॥

আ বো রুবণ্যুমৌশিজো হুবধ্যৈ ঘোষেব শংসমর্জুনস্য নংশে ।
প্র বঃ পূষ্ণে দাবন আঁ অচ্ছা বোচেয় বসুতাতিমগ্নেঃ ॥৫॥

শ্রুতং মে মিত্রাবরুণা হবেমোত শ্রুতং সদনে বিশ্বতঃ সীম্ ।
শ্রোতু নঃ শ্রোতুরাতিঃ সুশ্রোতুঃ সুক্ষেত্রা সিন্ধুরদ্ভিঃ ॥৬॥

স্তুষে সা বাং বরুণ মিত্র রাতির্গবাং শতা পৃক্ষয়ামেষু পজ্রে ।
শ্রুতরথে প্রিয়রথে দধানাঃ সদ্যঃ পুষ্টিং নিরুন্ধানাসো অগ্মন্ ॥৭॥

অস্য স্তুষে মহিমঘস্য রাধঃ সচা সনেম নহুষঃ সুবীরাঃ ।
জনো যঃ পজ্রেভ্যো বাজিনীবানশ্বাবতো রথিনো মহ্যং সূরিঃ ॥৮॥

জনো যো মিত্রাবরুণাবভিধ্রুগপো ন বাং সুনোত্যক্ষ্ণয়াধ্রুক্ ।
স্বয়ং স যক্ষ্মং হৃদয়ে নি ধত্ত আপ যদীং হোত্রাভির্ঋতাবা ॥৯॥

স ব্রাধতো নহুষো দংসুজূতঃ শর্ধস্তরো নরাং গূর্তশ্রবাঃ ।
বিসৃষ্টরাতির্যাতি বাহ্লসৃত্বা বিশ্বাসু পৃত্সু সদমিচ্ছূরঃ ॥১০॥

অধ গ্মন্তা নহুষো হবং সূরেঃ শ্রোতা রাজানো অমৃতস্য মন্দ্রাঃ ।
নভোজুবো যন্নিরবস্য রাধঃ প্রশস্তয়ে মহিনা রথবতে ॥১১॥

এতং শর্ধং ধাম যস্য সূরেরিত্যবোচন্ দশতয়স্য নংশে ।
দ্যুম্নানি যেষু বসুতাতী রারন্ বিশ্বে সন্বন্তু প্রভৃথেষু বাজম্ ॥১২॥

মন্দামহে দশতয়স্য ধাসের্দ্বির্যৎ পঞ্চ বিভ্রতো যন্ত্যন্না ।
কিমিষ্টাশ্ব ইষ্টরশ্মিরেত ঈশানাসস্তরুষ ঋঞ্জতে নৄন্ ॥১৩॥

হিরণ্যকর্ণং মণিগ্রীবমর্ণস্তন্নো বিশ্বে বরিবস্যন্তু দেবাঃ ।
অর্যো গিরঃ সদ্য আ জগ্মুষীরোস্রাশ্চাকন্তূভয়েষ্বস্মে ॥১৪॥

চত্বারো মা মশর্শারস্য শিশ্বস্ত্রয়ো রাজ্ঞ আয়বসস্য জিষ্ণোঃ ।
রথো বাং মিত্রাবরুণা দীর্ঘাপ্সাঃ স্যূমগভস্তিঃ সূরো নাদ্যৌৎ ॥১৫॥